מיט צער און טרויער ווערט אויפגענומען אצינד די שווערע בשורה איבער די פטירה פון הגה"צ רבי שמואל דוד טויב זצ"ל אבד"ק בריד, לאנגיעריגער מרביץ תורה אין ישיבה תורה ויראה ד'סאטמאר אין וויליאמסבורג, וועלכער איז יעצט נאכמיטאג נפטר געווארן אין עלטער פון זיבן און זיבעציג יאר.
דער רב זצ"ל איז געווען דער עלטסטער זון פון הגאון הצדיק המפורסם רבי עמרם טויב זצ"ל אדמו"ר מבריד ואבד"ק ערוגת הבושם אין באלטימאר, וועם כ"ק הרה"ק מסאטמאר זי"ע האט געשיקט קיין באלטימאר אריינצובלאזן א חיות דקדושה צווישן די ארטיגע אידנטום. דער רב זצ"ל איז געווען אן איידעם ביי הגאון הגדול רבי יודל וועבער זצ"ל ראש ישיבת פאפא, און א פלומעניק פון הגה"ק מפאפא זי"ע בעל ויחי יוסף.
צענדליגע יארן איז דער רב זצ"ל געזעסן באהלה של תורה, עוסק געווען בתורה בהתמדה רבה, און געדינט אלס מגיד שיעור און מרביץ תורה אין די סאטמארע ישיבה קטנה אין וויליאמסבורג, וואו ער האט אויפגעשטעלט תלמידים לאלפים און געלערנט מיט זיי תורה ויראת שמים.
ליידער איז ער נישט געווען אזוי געזונט די לעצטערע יארן, און היינט נאכמיטאג איז ער נפטר געווארן לחיי העולם הבא, איבערלאזנדיג א הערליכע דור פון חשובע קינדער און אייניקלעך תלמידי חכמים און מרביצי תורה. זיינע ברידער וועם ער לאזט איבער בחיים זענען הגה"צ ר' הערשל טויב שליט"א אב"ד בעהוץ אין קרית יואל, הגה"צ ר' ישעי' טויב שליט"א אב"ד ערוגת הבושם באלטימאר, און הגה"צ ר' ישראל שלום טויב שליט"א אב"ד באלטימאר אין וויליאמסבורג.
