די התרגשות ביי אלפי חסידי באבוב 45 בכל מקומות מושבותיהם שטייגט וואס א טאג נענטער צום היסטארישן חגיגת פתיחת שערים, פון די נייע ביהמ"ד הגדול והחדש מרכז העולמי באבוב 45, אין הארץ פונעם עיר ואם בישראל בארא פארק, נאך גאנצע צוואנציג יאר פון ארויסקוקן און ווארטן אויף דעם התרגשות'דיגן מאמענט פון הרחבת גבולי הקדושה.
עטליכע יאר פארביי איז אריבער זינט עס איז געלייגט געווארן די אבן הפינה פארן נייעם בית המדרש, ביים ווינקל פון די פערצנטע עוועניו און די ניין און פערציגסטע סטריט, אין די צייט וואס די בוי ארבעט איז אנגעגאנגען אויפן העכסטן גראד און א שנעלן טעמפא, מיט גרויס הארעוואניע שטייט מען שוין אצינד ביים חנוכת הבית פון די ערשטע שלב אין די בוי פראיעקט, די ערשטע טייל פונעם בנין ביהמ"ד האדיר וואס וועט באנייעט ווערן צום בעפארשטייענדן ימים הנוראים הממשמשים ובאים.
די ריזן בית המדרש הגדול נעמט אריין א גיגאנטישע היכל בית המדרש מיט דריי שטאק גאלעריעס, א ריזן היכל התורה אויף די אונטערשטע שטאק, א פראכטפולע מקוה און דאווענען שטיבלעך לרווחת הציבור. די בוי פראיעקט האט שוין אפגעקאסט די פאנטאסטישע סומע פון 55 מיליאן דאללער, וואס איז באצאלט געווארן דורך חסידי ומעריצי ק"ק באבוב 45, געשאפן דורך די געניטע וועד קרן הבנין און די פאנדרעיזינג אפיס.
בחיים חיותו פון רבי'נס זיידע הרה"ק מבאבוב זי"ע, ווען מען האט באנייעט די גרויסע בית המדרש הגדול מיט ארום פערציג יאר צוריק, איז מען אריין אין די נייע שוהל לקראת די ימים הנוראים, און דער באבובער רב האט געהייסן אריינגיין אין די נייע שוהל א שבת בעפאר ראש השנה, כדי אז ווען מען קומט אריין צו די תפילות ראש השנה זאל מען שוין זיין צוגעוואוינט אין די נייע בנין, און קענען דאווענען מיט הרחבת הדעת.
על דעתם פון די פריערדיגע צדיקים, וועט זיך אויך דאס יאר אפשפילן דאס זעלבע, ווען בפקודת הקודש פונעם רבי'ן שליט"א וועט מען אריינגיין אין די נייע ביהמ"ד שוין א שבת בעפאר ראש השנה, די צווייטע שבת פון סליחות פרשת נצבים, ווען דער רבי שליט"א וועט צום ערשטן מאל פראווענען די תפילות אין די נייע בית המדרש, און מחנך זיין דעם מקום קדוש ביומא דשבתא, סמוך ונראה צום הייליגן יו"ט ראש השנה, וואס כל שיתא יומין מינייהו מתברכין.
