א פרייליכע שמחה איז פארגעקומען די וואך אין ארץ ישראל, ווען עס איז אין א מזל'דיגע שעה אריינגעקומען בברית האירוסין, בנן של קדושים הב' החשוב שלמה שמחה האלבערשטאם, צווייטער און יונגסטער זון פון כ"ק אדמו"ר מצאנז זמיגראד זצ"ל בעל ביכורי חיים, בנו ממלא מקומו פון כ"ק אדמו"ר בעל ארי' שאג מצאנז זימיגראד זצ"ל.
דער צאנז זמיגראדער רבי זצ"ל בעל ביכורי חיים איז נפטר געווארן מיט ניין יאר צוריק אין בליענדן עלטער פון פיר און זעכציג יאר, איבערלאזנדיג א שיינעם דור, און זיינע צוויי זיהן, חשובע בחורים. דער עלטסטער זון הרב סיני שליט"א וועלכער איז געווארן אויפגענומען אלס ממשיך השלשלת אנצופירן דעם צאנז זימיגראדער בית המדרש אין בני ברק, האט חתונה געהאט אין א מזל'דיגע שעה מיט צוויי יאר צוריק.
אצינד איז דער צווייטער זון שלמה שמחה א חתן געווארן בשעה טובה ומוצלחת, מיט די כלה א טאכטער פון הרב החסיד ר' שמעון קעניג הי"ו מחשובי חסידי צאנז אין קרית צאנז נתני'. די שמחת הווארט איז פארגעקומען דעם מאנטאג אין ביהמ"ד צאנז זמיגראד אין בני ברק.
