איבערראשונג און פרייד נעמט ארום תלמידי וחסידי באבוב 45 איבער די גארער וועלט, ווען עס ווערט געמאלדן די נייעס משערי ציון פון ירושלים עיר הקודש, אז צום קומענדיגן לערן יאר וועט בעז"ה געעפנט ווערן א נייער תלמוד תורה פאר חסידי באבוב 45 אין ירושלים, אלס נאך א רינגעלע אין די קייט פון מוסדות הקדושים באבוב 45 צושפרייט איבער אלע עקן וועלט.
קהילה קדושה באבוב 45 בארץ הקודש וואקסט און בליהט בליעה"ר, און פארמאגט בתי מדרשים און כוללים אין ירושלים, בני ברק, בית שמש, ביתר, און אלעד. איבערהויפט איז פארהאן א גרויסע צאל חסידים וואס וואוינען אין ירושלים, און זענען מקושר באילנא דחיי צום רבי'ן שליט"א מעבר לים, און פאר א שיינע תקופה איז מתנוסס לשם ולתפארה די בארימטע ישיבה קטנה דחסידי באבוב 45 אין ירושלים. אצינד ווערט בעז"ה געעפנט די נייע תלמוד תורה פאר די ארטיגע חסידים, צו קענען מחנך זיין די קינדערלעך אויפן דרך המסורה וואס מען האט צוגעזעהן די אלע יארן ביי די הייליגע צדיקים לבית באבוב זי"ע.
צום גרינדונג פון די נייע תלמוד תורה בברכתו ובעידודו פון כ"ק אדמו"ר מבאבוב 45 שליט"א, האט דער רבי אויפגענומען א ספעציעלער וועד הרוחני וואס זאל שטיין אין שפיץ פון אלע רוחניות'דיגע אנגעלענגהייטן, אינאיינעם מיטן איש החינוך הרב ישראל יהודה קרישעווסקי שליט"א מנהל ת"ת סקווירא אין ירושלים.
