בעידן חדוותא במעון קדשו פון כ"ק אדמו"ר מבית יצחק ספינקא שליט"א, מיטן געבורט פון א דאפלטע אור אייניקל ביים רבי'ן, בן הנולד ביי זיין אייניקל הרב בעריש הורוויץ שליט"א, זון פונעם רבינ'ס זון הגה"צ ר' יודל הורוויץ שליט"א, און איידעם ביים רבינ'ס איידען הגה"צ ר' ארי' מרדכי ראבינאוויטש שליט"א, זון פון כ"ק אדמו"ר ממשכנות הרועים שליט"א, האט דער ספינקא רבי מכבד געווען כ"ק אדמו"ר מסאטמאר שליט"א מיט סנדקאות, וואס ווי באקאנט איז דער ספינקא רבי אדוק ומקושר צום סאטמארער רבי'ן רבות בשנים.
די שמחת הברית איז פארגעקומען פארגאנגענע וואך דינסטאג, ווען דער ספינקא רבי איז ארויסגעקומען קיין קרית יואל שוין פארן דאווענען, און האט געדאווענט אינאיינעם מיטן סאטמארער רבי'ן אין ביהמ"ד הגדול אין קרית יואל. נאכן דאווענען איז פארגעקומען די ברית וואו דער סאטמארער רבי איז מכובד געווארן מיט סנדקאות און ברכות וקריאת השם, און דער ספינקא רבי איז מכובד געווארן מיט עמידה לברכות.
דערנאך איז פארגעקומען א מסיבת לחיים וואו די אדמורי"ם האבן פארברענגט א שטיק צייט מיט גרויס ידידות, דערביי האט דער סאטמארער רבי געוואונטשן מזל טוב דורכ'ן טעלעפאן פארן זיידן כ"ק אדמו"ר ממשכנות הרועים שליט"א.
