ככלות השבעה צו די הסתלקות פון כ"ק אדמו"ר מפאריסוב זצ"ל, וועט דעם קומענדיגן זונטאג פארקומען א גרויסע עצרת הספד והתעוררות בהיכל בית מדרשו אויף רחוב לוי יצחק מבארדיטשוב אין די מאה שערים געגנט אין ירושלים, וואו גדולי אדמורי"ם און מקובלים וועלן משמיע זיין דברי הספד וזכרון, על האי שופרא דבלי בארעא, די שרעקליכע אבידה מיטן הסתלקות פונעם רבי'ן זצ"ל.
די יומא אריכתא וועט זיך אנהייבן אין די נאכמיטאג שעה'ן ווען עס וועט פארקומען די צענטראלע עלי' לציון על קברו פונעם רבי'ן זצ"ל, אינאיינעם מיט די מעמד הקמת המציבה. שפעטער אויפדערנאכט נאך מעריב וועט זיך אנהייבן די עצרת הספד, און מען וועט הערן א רייע דרשות און הספדים, די משא המרכזי דורך אחיו הגדול כ"ק אדמו"ר ממשכנות הרועים שליט"א, דברי הספד דורכ'ן ברודער כ"ק אדמו"ר מקאלושין שליט"א, דברי הספד פונעם רבינ'ס איידעם כ"ק אדמו"ר מספינקא ב"ב שליט"א, דברי זכרון פון גדולי מקובלים, הגאון ר' עמרם אופמאן שליט"א מראשי ישיבת שער השמים, הגאון ר' שמשון פרץ שליט"א, און הגאון רבי נחום כהן שליט"א.
דעם שבת קודש פרשת ראה במלאות השבעה, וועט בנו ממלא מקומו כ"ק אדמו"ר מפאריסוב שליט"א צום ערשטן מאל פראווענען די תפילות און טישן במקום אביו הגדול אין ביהמ"ד דרכי צדק פאריסוב אין ירושלים, ווי איינגעפירט דורכ'ן רבי'ן זצ"ל וועט מען דאווענען שחרית כוותיקין, און די טיש פרייטאג צונאכטס וועט פארקומען צען דרייסיג ביינאכט.
אויף שבת וועט אויך זיין צוגאסט כ"ק אדמו"ר מקרעטשניף קרית גת שליט"א, חתנא דבי נשיאה פונעם רבי'ן זצ"ל, וועלכער וועט מיטהאלטן דעם שבת ביים שוואגער כ"ק אדמו"ר מפאריסוב שליט"א.
