נעכטן מיטוואך פרשת בא לסדר ויצעקו בני ישראל אל ה', זענען די חברי הביד"ץ אינעם בית דין צדק דק"ק וויזניץ אין קרית וויזניץ בני ברק, ארויסגעקומען מיט א הייסע ווענדונג צו כלל חסידי וויזניץ ברחבי תבל, מען זאל ממשיך זיין מיט די תפילות ובקשות למען בריאותו השלימה פון כ"ק אדמו"ר מוויזניץ שליט"א לרפואה שלימה, און מוסיף זיין מזמורי תהלים דער רבי זאל האבן א גאנצע רפואה.
אינעם בריוו וואס איז אונטערגעשריבן דורך הגאון הגדול ר' משה שאול קליין שליט"א רב שכונת אור החיים, הרה"ג ר' יעקב מאיר שטערן שליט"א, הרה"ג ר' שרגא פייוויל וויינבערגער שליט"א, הרה"ג ר' ישראל מיללער שליט"א, און הרה"ג ר' יצחק אייזיק טוביאס שליט"א, שרייבן די דיינים איבער דעם וואס שוין איבער א יאר איז מען געפרואווט געווארן מיט א שווערע נסיון פונעם אויבערשטן, מיט די מצב הבריאות ביים רבי'ן שליט"א, מיטן אויבערשטנס הילף זעהט מען ווי תפילות ישראל עושה רושם, מען זעהט זאכן למעלה מדרך הטבע אויף וואס מען טוט דאנקן און לויבן דעם אויבערשטן, אבער אין די זעלבע צייט דארף מען זיך ווייטער מתחזק זיין צו מרבה זיין בתפילה.
די רבנים שרייבן אז אין די יעצטיגע צייט ווען מען איז ממשיך מיט די באהאנדלונגען, וואס טוט ליידער צוברענגען שוואכע כוחות ל"ע, און יעדער איינער קוקט ארויס אויף בעסערע צייטן דער רבי זאל זיין בכח צו משפיע זיין מהודו בברכיות גופא ונהורא מעליא, זאל יעדער ווייטער ממשיך זיין צו זאגן יעדן טאג קאפיטל ס"א אין תהלים, און מרבה זיין מיט קבלות טובות און מעשים טובים לזכותו פונעם רבי'ן. אזוי אויך זאל יעדער מוסיף זיין מזמורי תהלים און די פסוקים פון תמניא אפי אויפן רבינ'ס נאמען לרפואה שלימה.
אין די זעלבע צייט גרייט מען זיך אצינד צו די פרייליכע ימי השמחה בחצר הקודש, ווען עס וועט צום ערשטן מאל געפראוועט ווערן ביים רבי'ן אין הויף א חתונה פון א אור אייניקל ביים רבי'ן, די חתן א אייניקל ביים רבינ'ס איידעם כ"ק אדמו"ר מוויזניץ שליט"א פון בית שמש, און א אייניקל ביי זיין ברודער כ"ק אדמו"ר מוויזניץ שליט"א פון קייאמישע. דעם מוצאי שבת קודש בהמשך צו שלש סעודות וועט פארקומען די שמחת הפארשפיל בתופים ובמחולות, נאך וואס דער רבי שליט"א וועט בעז"ה פראווענען דעם שבת קודש פרשת בא ברוב עם אין ביהמ"ד הגדול אין קרית וויזניץ בני ברק. די שמחת החתונה וועט פארקומען קומענדיגן מיטוואך בשלח אין ביהמ"ד הגדול אין קרית וויזניץ בני ברק.
