חסידי ומעריצי בית סטאניסלאוו האבן אויפגענומען מיט איבערראשונג די פרייליכע בשורה, אז אויף אן ערשטמאליגע פארנעם וועט כ"ק אדמו"ר מסטאניסלאוו שליט"א אפרעכטן א ספעציעלע שבת התאחדות מיט כלל חסידיו ומעריציו, וואס וועט פארקומען אין די פראכטפולע ארמון האטעל אין סטעמפארד קאנעקטיקוט.
די באשיידענע סטאניסלאווער הויף אין מאנסי וואו כ"ק אדמו"ר מסטאניסלאוו שליט"א רעכט אפ די עבודת הקודש בסילודין, איז אין די לעצטע פאר יאר פארוואנדלט געווארן אלס א צוציאונגס קראפט פאר הונדערטער אידן חסידים ואנשי מעשה מבקשי ה', וואס קומען זיך דערווארעמען בצילא דמהימנותא און שעפן חיזוק און חיות דקדושה, פון דעם רייכן קוואל וכח ההשפעה מיט וואס דער רבי שליט"א איז באקאנט.
אצינד נאך לענגערע הפצרות פון די חסידים און די ראשי הקהילה, האט דער רבי שליט"א צוגעשטימט ארויסצופארן אויף א שבת אינאיינעם מיט די חסידים ומעריצים, די שבת איז באשטימט געווארן אויף קומענדיגן פרשת שלח שבת מברכים חודש תמוז, און וועט אפגעהאלטן ווערן אין די פראכטפולע ארמון האטעל אין סטעמפארד קאנעקטיקוט, וואס וועט פארוואנדלט ווערן פאר אט דעם שבת אין די סטאניסלאווער הויף אויף א העכערע אטמאספערע.
