מיט אומבאשרייבליכע צער און שאק איז אויפגענומען געווארן די שווערע בשורה איבער די פטירה פון הרב החסיד המפואר ר' מאיר טויב ע"ה מנכבדי חסידי וויזניץ אין מאנסי, משמש בקודש ביי כ"ק אדמו"ר מוויזניץ זצ"ל, און לאנגיעריגער מנהל פון מוסדות וויזניץ אין בארא פארק.
ר' מאיר האט זוכה געווען לשרת בקודש ביים וויזניצער רבי'ן הרה"ק בעל תורת מרדכי זצ"ל, ער פלעגט באדינען ביי די טישן, און אנהייבן די ניגונים אויף א קביעות'דיגע פארנעם. אזוי אויך האט ער פאר צענדליגע יארן נאכאנאנד געדינט אלס מנהל המוסדות אין בארא פארק, געטראגן דעם עול צו אנהאלטן די קרן התורה אויף א שטאנדהאפטיגע פארנעם, אויפגעבויעט בנינים אדירים לשם ולתפארת, און געפירט די קאסע צו אפצאלן די חשובע מלמדים וואס זענען עוסק על מלאכת הקודש.
נאכן וויילן אין שפיטאל די לעצטע פאר טעג צוליב א מינדערוויכטיגע פראצעדור, איז ער אהיימגעקומען נעכטן מוצאי שבת, אבער א קורצע צייט דערויף האט ער פארלוירן דעם אטעם, און טראץ די פרואוון פון די חברה הצלה איז ער ליידער פלוצלינג נפטר געווארן לחיי העולם הבא, אין בליענדן עלטער פון פיר און זעכציג יאר, איבערלאזנדיג א הערליכע משפחה פון חשובע קינדער זרע ברך ה', אריינגערעכנט איין בחור נאך אינדערהיים.
יעצט צוויי אזייגער נאכמיטאג פארזאמלען זיך הונדערטער אידן תושבי בארא פארק און בפרט חסידי וויזניץ, אפצוגעבן דעם כבוד האחרון פארן געטרייען מנהל המוסדות רבות בשנים, די לוויה קומט פאר ביים בנין הת"ת אמרי חיים וויזניץ אויף די דריי און פופציגסטע סטריט ביי די אכצנטע עוועניו, און שפעטער ביינאכט וועט פארקומען די לוויה פארנט פון ביהמ"ד הגדול וויזניץ אין מאנסי.
