די עולם הקבלה והחסידות אין ארץ ישראל איז איינגעהילט אין טרויער, נאך די הסתלקות לשמי מרום פון כ"ק אדמו"ר מאשלג זצ"ל, הרה"צ רבי יעקב משה שמואל גרנירער זצ"ל, וועלכער איז דעם פרייטאג צונאכטס נפטר געווארן לחיי העולם הבא, אין עלטער פון איין און אכציג יאר.
דער רבי זצ"ל איז געווען א זון פון הרב סיני גרנירער זצ"ל, און איז געבוירן אין שטאט סאדיגורא, זייענדיג א אייניקל פון רוזין סאדיגורא חסידים לדורותיהם. אלס בחור האט ער געלערנט אין די פאנאוויטשער ישיבה אין בני ברק, זייענדיג א תלמיד פון די גדולי וגאוני עולם ראשי הישיבות פון די פריערדיגע דור.
בהגיעו לפירקו איז ער געווארן אן איידעם ביי כ"ק אדמו"ר רבי ברוך שלום זצ"ל מאשלג, בעל ברכת שלום, א זון פון כ"ק אדמו"ר בעל הסולם מאשלג זצ"ל. אלס אינגערמאן האט ער מרביץ תורה געווען פאר תלמידים אין ישיבת חידושי הרי"ם דחסידי גור אין תל אביב, און אין ישיבת מאמר מרדכי נדבורנא אין בני ברק.
שפעטער איז ער געווארן אויפגענומען אלס רבי, ממלא צו זיין דאס פלאץ פון זיין שווער און שוואגער באדמורו"ת אשלג, ער האט משפיע געווען פאר חסידים בבית מדרשו ביהמ"ד האר"י אשלג אויף רחוב חזון איש, סיי בתורת הנגלה און סיי בתורת הקבלה. דעם שבת איז ער נפטר געווארן לחיי העולם הבא איבערלאזנדיג א שיינעם דור, די לוויה איז פארגעקומען מוצאי שבת קודש בהיכל בית מדרשו אין בני ברק.
