שוין עטליכע יאר איז מפעל חיים של שלום אקטיוו בחצר הקודש באבוב, צו העלפן די מחותנים מיט די גרויסע חתונה הוצאות, בברכתו ובעידודו פון כ"ק אדמו"ר מבאבוב שליט"א, און בפרט ווערט געלייגט א שטארקע דגוש צו שניידן אומנויטיגע הוצאות סיי ביים חתונה נאכט, סיי ביי די אנדערע ימי השמחה, און סיי מיט די צוגרייטונגען לקראת די שמחת החתונה.
אצינד איז ארויסגעשטעלט געווארן א נייער פארשלאג מיטן ציהל צו שניידן אומנויטיגע הוצאות, איבער דעם וואס אין די שבעת ימי המשתה איז איינגעפירט צו פראווענען יעדע נאכט א גרויסע שבע ברכות, וואס קאסט ווי פארשטענדליך גרויסע געלטער פאר די מחותנים זיידעס און קרובי המשפחה, און נאך א אויספרעג ביים ציבור האבן די עסקנים געזעהן אז רובם ככולם דארפן עס בכלל נישט האבן.
דעריבער זענען די עסקנים פון מפעל חיים של שלום ארויסגעקומען מיט א פרישע פארשלאג, בלויז אלס א פארשלאג און נישט אלס א תקנה, אז אנשטאט צוויי שבע ברכות'ן אין די וואכן טעג, זאלן איינער פון די זיידעס אדער מחותנים לאדענען דעם פארפאלק אויף א נאכטמאל, און מען זאל ניטאמאל רופן קיין מנין צו זאגן שבע ברכות, לויט די הוראה פון די באבובער בית הוראה וואס האט קלארגעשטעלט אז עס איז נישטא קיין שום ענין דערין.
ומתן שכרה בצידה, וועלן די ערשטע זעכציג מחותנים וואס גייען איין דערויף פון ראש חודש אלול הבעל"ט, ערהאלטן א ספעציעלן קרעדיט פון פופצן הונדערט דאללער פאר הוצאות החתונה, אין צוגאב צו א גיפט קארטל פון פינף הונדערט דאללער וואס וועט געשאנקען ווערן פארן חתן וכלה.
