אידישע קינדער טוען מעתיר ומפציר זיין בתפילה לרפואת כ"ק אדמו"ר מצאנז שליט"א פון בארא פארק, וועלכער געפונט זיך ליידער אין שפיטאל אין א שווערן מצב, און איז אנגעוויזן אויף רחמי שמים מרובים.
דער רבי שליט"א וועלכער איז ממלא מקום אביו הגדול כ"ק אדמו"ר מצאנז זצ"ל פון ב"פ זייענדיג דער עלטסטער זון, איז באקאנט מיט זיין געוואלדיגע עבודה אין גמילות חסדים, און פירט אן די צאנזער הכנסת אורחים ארויסצוהעלפן אידישע קינדער מיט אכסניות אין בארא פארק, מיט א זעלטענע ווארעמקייט און ליבליכקייט צו יעדן איינעם.
ליידער מוטשעט זיך דער רבי שוין א לענגערע צייט מיט די ביטערע מחלה ה"י, און אין די לעצטערע וואכן איז אנטשטאנען א ערנסטע פארערגערונג אינעם מצב, איבערהויפט היינט אינדערפרי ווען די מצב איז געווען גאר שרעקליך, און די בני המשפחה זענען גערופן געווארן צום ען וויי יו שפיטאל אין מאנהעטן צו זיין סמוך למיטת חליו פונעם רבי'ן שליט"א.
בהוראת הקודש פון כ"ק אדמו"ר מפשעווארסק שליט"א און הגה"צ ר' יעקב מאיר שעכטער שליט"א, האט מען היינט צוגעלייגט א נאמען אלס א זכות פאר א רפואה, כלל ישראל ווערט גערופן צו מתפלל זיין פאר כ"ק מרן שמחה ברוך בן מלכה בתוך שאר חולי ישראל, והן קל כביר לא ימאס תפילת הרבים.
