היינט נאכמיטאג האט דער הויכראנגיגער קאנגרעס ספיקער מייק דזשאנסאן באזוכט בביתו נאוה קודש פון כ"ק אדמו"ר מסקווירא שליט"א, זייענדיג אויף א באזוך אין ראקלענד קאונטי צו אויפטרעטן ביי א פארזאמלונג מיטן לאקאלן קאנגרעסמאן מייק לאולער.
די עהרנפולע דעלעגאציע איז געווארן אפגעווארט דורך די ראשי הקהילה און עסקני השיכון, וועלכע האבן אריינגעפירט דעם ספיקער און זיינע באגלייטער צום הערליכן נייע פראווע צימער פון כ"ק אדמו"ר מסקווירא שליט"א. ביי א רייך געדעקטע טיש זענען די הויכראנגיגע פאליטיקאנטן געזעצט געווארן מיט כבוד, דער קאנגרעס ספיקער מייק דזשאנסאן, דער קאנגרעסמאן מייק לאולער, און נאך עטליכע פון זייערע געהילפן.
כ"ק אדמו"ר מסקווירא שליט"א האט זיך אינטערסירט איבער זייער ארבעט און אויסגעשמועסט פארשידענע טעמעס אינאיינעם מיט די ראשי הקהילה והמוסדות. דער קאנגרעס ספיקער האט געזאגט פארן רבי'ן אז ער ארבעט צו אראנדזשירן א באגעגעניש צווישן דעם רבי'ן און דער פרעזידענט פון די פאראייניגטע שטאטן דאנאלד טראמפ, וואס וועט מעגליך פארקומען אין די נאנטע צוקונפט.
דער סקווירא רבי שליט"א האט ווארעם געוואונטשן פאר די באאמטע זיי זאלן זעהן הצלחה און סייעתא דשמיא בכל מעשי ידיהם, און די עסקני הקהילה האבן ארויסבאגלייט די חשובע געסט מיט גרויס כבוד.
