דעם אנהייב וואך פרשת ויקרא וועט כ"ק אדמו"ר מסטוטשין שליט"א ארויספארן אויף א קורצע נסיעה קיין אייראפע, נאך וואס דער רבי שליט"א איז געווארן איינגעלאדנט דורך די הנהלה פון כולל חבת ירושלים לצדקת רבי מאיר בעל הנס, אויפצוטרעטן מיט א דרשה אלס אורח הכבוד ביי די צוויי יערליכע דינער'ס אין אייראפע, אין לאנדאן און אנטווערפן.
דער סטוטשינער רבי שליט"א וועלכער דינט אלס חבר נשיאות הכולל, גייענדיג בדרכי אבותיו ורבותיו הקדושים, האט שוין עטליכע מאל אויפגעטרעטן ביי די חבת ירושלים דינערס דורכאויס די יארן. אצינד ווען מען גרייט זיך צו די יערליכע דינער'ס וואס קומט פאר אין לאנדאן און אנטווערפן אין די טעג ארום ראש חודש ניסן, איז דער רבי נתכבד געווארן צו אויפטרעטן אלס אורח הכבוד און מעורר זיין דעם ציבור איבער די געוואלדיגע חשיבות פון שטיצן דעם הייליגן קופה וואס איז מקודש ביי כלל ישראל שוין הונדערטער יארן.
דער רבי וועט זיך ארויסלאזן אין וועג דעם מאנטאג ויקרא, און צוערשט אפשטאטן א קורצע באזוך בעיר הבירה לאנדאן, וואו די יערליכע דינער איז באשטימט אויף דינסטאג נאכט ליל ערב ראש חודש ניסן, אין די זאלן פון יסודי התורה במעמד אלפי תושבי העיר, אין שפיץ פון די אדמור"י ורבני העיר. אויסער די פייערדיגע דרשה פונעם סטוטשינער רבי'ן שליט"א וועט מען אויך הערן דברות קודש פון כ"ק אדמו"ר מספינקא אנטווערפן שליט"א, וועלכער קומט צו פארן קיין לאנדאן באשיינען די מסיבה נהדרה, במקומו פון זיין גרויסן שוואגער כ"ק אדמו"ר מפשעווארסק שליט"א נשיא הכולל באייראפע, וועלכער פלעגט יאר יערליך קומען קיין לאנדאן באשיינען די מעמד.
מיטוואך אינדערפרי וועט דער סטוטשינער רבי שליט"א ארויספארן דעם וועג פון לאנדאן קיין אנטווערפן, וואו די יערליכע דינער איז באשטימט אויף מיטוואך נאכט ליל ראש חודש ניסן, אין די זאלן פון בית רחל במעמד אלפי תושבי העיר, אין שפיץ פון די אדמור"י ורבני העיר, ובראשם כ"ק אדמו"ר מפשעווארסק שליט"א נשיא הכולל באייראפע. אויסער די פייערדיגע דרשה פונעם סטוטשינער רבי'ן שליט"א וועט מען אויך הערן דברות קודש פון כ"ק אדמו"ר מספינקא אנטווערפן שליט"א, און דברי ברכה פון כ"ק אדמו"ר מפשעווארסק שליט"א נשיא הכולל באייראפע. א דרשה פון הגה"צ ר' אהרן שיף שליט"א גאב"ד אנטווערפן, און א דרשה פון הגה"צ ר' חיים טירנויער שליט"א רב ביהמ"ד נחלת אברכים אין אנטווערפן ור"ם בישיבת ווילרייק.
