אין די יעצטיגע טעג האט הגה"צ ר' געציל בערקאוויטש שליט"א דומ"ץ קרית יואל ובעל אגלי דבש, אויפגענומען זיין זון הרה"ג ר' ליפא בערקאוויטש שליט"א, צו שטיין אין שפיץ פון די בארימטע חברים ארגענעזאציע אין קרית יואל, און דינען אלס דער רב און דיין פון די ארגענעזאציע פאר סיי וועלכע שאלה עס מאכט זיך.
די חברים ארגענעזאציע האט זיך שטארק פארברייטערט אין די לעצטע תקופה, מיט די מאסיווע בליה און וואוקס פון די שטאט קרית יואל אריבער אלע גרעניצן, עס מאכט זיך כסדר הלכה'דיגע שאלות אין פארשידענע סארט אופנים, און עס האט זיך אנגעזעהן א שטארקע נויט צו האבן א אפיציעלער דיין וואס זאל זיין שטענדיג גרייט צו ענטפערן די אלע שאלות.
דער קרית יואל'ער דיין שליט"א וועלכער טראגט די אחריות פון אלע אנגעלעגנהייטן אין שטאט, האט אויפגענומען זיין זון הרה"ג ר' ליפא בערקאוויטש שליט"א, אז ער זאל זיין דער רב ודומ"ץ פאר די טאג טעגליכע שאלות, וכל הדבר הקשה יביאון אליו, ווען דער קרית יואל'ער דיין וועט ווייטער שטיין על המשמר בראש.
א באשיידענע מעמד התמנות איז פארגעקומען אין שטוב פונעם קרית יואל'ער דיין שליט"א, מיט די באטייליגונג פון די ראשי העסקנים פון חברים, און עטליכע דיינים ומורי הוראה אין שטאט. אויך איז פארגעקומען א גרעסערע מעמד מיט די באטייליגונג פון אלע חברים מעמבערס פון קרית יואל, וואו דער קרית יואל'ער דיין האט אויפגעטרעטן, און אזוי אויך זיין זון דער נייער דיין פון חברים.
