מטעם בית כ"ק אדמו"ר מבעלזא שליט"א איז היינט באשטעטיגט געווארן, אז די גרויסארטיגע מעמד הכנסת ספר תורה פאר די ספר תורה וואס ווערט געשריבן דורך די טויזענטער חסידים איבער די גארער וועלט, לכבודו ולזכותו פון כ"ק אדמו"ר מבעלזא שליט"א, וועט פארקומען קומענדיגע וואך פרשת בשלח ביום הגדול ט' שבט ברוב פאר והדר, אין קרית מלך רב קרית בעלזא ירושלים.
די פראיעקט צו שרייבן דעם פאראייניגטן ספר תורה האט זיך אנגעהויבן מיט איבער א יאר צוריק, ווען הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א האט פראקלאמירט די געדאנק פאר די חסידים, און זינט דאן האבן טויזענטער חסידים פון איבער די גאנצע וועלט זיך אנגעשלאסן מיט א פאראייניגטע כח צו קויפן זכותים און פרשיות אינעם ספר תורה, און דערמיט געבן דעם זכות פארן מנהיג העדה כ"ק אדמו"ר מבעלזא שליט"א למען יאריך ימים על ממלכתו.
אצינד איז באשטעטיגט געווארן אז די גרויסארטיגע חגיגת הכנסת ספר תורה וועט פארקומען קומענדיגע וואך פרשת בשלח, אין די פרייליכע טאג פון ט' שבט וואס איז יאר יערליך א יום אורה ושמחה בחצר הקודש בעלזא, די טאג וואס די הייליגע צדיקים די אחים הקדושים הרה"ק מבעלזא און הרה"ק מבולגרייא זי"ע זענען געראטעוועט געווארן מגיא צלמות ביים צווייטן וועלט קריג.
