אין די יעצטיגע טעג ווערן געמאכט העפטיגע בוי ארבעט אין די פראכטפולע גרויסע קלויז פון חסידי באיאן אין ירושלים, ווען עס ווערט פארענדיגט א זעלטן שיינע ארון הקודש לכבוד ולתפארת, וואס וועט באשיינען די מזרח וואנט על פני כל המתפללים ולומדים, און צוגעבן צו די שיינקייט פון דעם הייליג בית המדרש לפאר ולרומם את בית השם.
אין די פארלאפענע פאר יאר איז אנגעגאנגען העפטיגע בוי ארבעט צו פארענדיגן דעם גאנצן בנין הקלויז לשם ולתפארת, אין די לעצטערע וואכן האט מען זיך גענומען צו די עבודת הקודש אויפצובויען א מלכות'דיגע ארון הקודש, געלונגענע ארבייטער און ארכיטעקטן האבן צושטייער געגעבן, אין שפיץ פון דער לעגענדארער ארכיטעקט הרב החסיד ר' אהרן עסטרייכער הי"ו פון ירושלים, אשר ידיו רב לו אויפצובויען פראכטפולע בתי מדרשים איבער די גארער וועלט.
א ספעציעלע געוויכט איז געלייגט געווארן צו פארשענערן די ארון הקודש מיט א נאסטאלגישע כיפה, גענוי ווי אין די היסטארישע תפארת ישראל שוהל אין אלטשטאט ירושלים, וואס וועט צוגעבן צו די שיינע בילד וואס איז אט אט שוין גרייט.
דעם קומענדיגן יום טוב שבועות הבא עלינו לטובה, בבוקרו של יום זמן מתן תורתינו, בעפאר קריאת התורה, זאגן די פיוט פון אקדמות און ליינען די עשרת הדברות קבלת התורה, וועט פארקומען די געהויבענע מעמד חנוכת ארון הקודש, אינאיינעם מיט די מעמד הכנסת ספר תורה וואס איז נתנדב געווארן דורך הנגיד ר' ארי' שטערן הי"ו, דער נדבן פון די פראכטפולע ארון הקודש.
