קומענדיגן מאנטאג כ"ב אב וועט פארקומען די גרויסע חתונה בחצרות הקודש באיאן און וויזניץ, די חתן א אייניקל פון כ"ק אדמו"ר מבאיאן שליט"א, א זון פון זיין איידעם כ"ק אדמו"ר מזידטשויב שיקאגא שליט"א, מיט די כלה א אייניקל פון הגה"צ ר' מנחם ארנסטר שליט"א ראש ישיבת וויזניץ.
די גרויסע חתונה וועט פארקומען אינעם ריזן היכל ביהמ"ד הגדול "בית וויזניץ" אין קרית וויזניץ בני ברק, במקהלות אלפי ישראל חסידי באיאן און חסידי וויזניץ וועלכע וועלן זיך מיטפרייען אינאיינעם ביי די חתונה הגדולה כשהמלכים במסיבם. דער געהויבענער עלטער פעטער כ"ק אדמו"ר מוויזניץ שליט"א וועלכער וויילט אין חלדודנא דורכאויס די זוממער וואכן, וועט זיך צוריקקערן קיין ארץ ישראל קומענדיגן זונטאג צו באשיינען די גרויסע שמחה בצל קורתו.
אנדערש ווי ביי אלע חתונות וועט דאס מאל פארקומען די מעמד החופה אויף א אנדערע פלאץ, צוליב דעם ריזן ציבור וואס איז ערווארטעט אנטייל צו נעמען, די חופה פלאטפארמע ווערט אויפגעשטעלט אויף רחוב טל חיים, די מענער וועלן זיין אויף רחוב טל חיים און שדרות וויזניץ, און די פרויען אויף רחוב טל חיים און דמשק אליעזר.
דעם שבת וועט פארקומען די שמחת האויפרוף בחצר הקודש באיאן, הונדערטער חסידי באיאן פון אלע שטעט גרייטן זיך מיטצוהאלטן די געהויבענע שבת של שמחה בצל הקודש, איבערהויפט די גרויסע מעמד ה'באגלייטן שבת אינדערפרי איידער די באווארפן, וואס הייבט זיך אן בביתו נאוה קודש פון כ"ק אדמו"ר מבאיאן שליט"א, און איז ווי באקאנט א זעלטן געהויבענע מעמד אין באיאנער הויף.
בלויז די עלטערע אידן און בני המשפחה וועלן זיין ערלויבט מיטצוהאלטן די באגלייטן אנגעהויבן פונעם רבינ'ס שטוב, די עלטערע אינגעלייט ווען אפווארטן ביי רחוב הטורים, די אינגעלייט אויף רחוב מלכי ישראל, און די בחורים אויף די פארענטשעס אין ביהמ"ד בקול שירה וזמרה שמחה וצהלה.
די שמחת החתונה וועט ווערן נאכגעפאלגט מיט א רייכע סדר ימי השמחה, מיטוואך וועט פארקומען א גרויסע מעמד אין ביהמ"ד הגדול באיאן אין ירושלים, געאייגענט פאר די הונדערטער בחורי הישיבות הקדושות דחסידי באיאן, אין שפיץ פון כ"ק אדמו"ר מבאיאן שליט"א, דערביי וועט מען הערן א פייערדיגע אינספירירנדע דרשה פון הרב שלום מרדכי רובאשקין שליט"א בעניני אמונה און מסירת נפש.
שבת שבע ברכות וועט פארקומען בחצר הקודש וויזניץ אין בני ברק, בצל הקודש פונעם געהויבענעם פעטער כ"ק אדמו"ר מוויזניץ שליט"א.
