אין א ערשטמאליגע שריט האט כ"ק אדמו"ר מבאיאן שליט"א אפגעשריבן א מכתב קודש צו די חסידים פון אמעריקע, וואו דער רבי טוט זיי איינלאדענען צו קומען קיין ארץ ישראל אויף א שבת, און וויילן אינאיינעם בצילא דמהימנותא, נאך וואס דער רבי איז נישט בכח ארויסצופארן קיין אמעריקע משפיע זיין פאר די חסידים פונדערנאנט.
דער רבי שליט"א שרייבט אינעם בריוו אז זיין רגשי געגועים וחיבה צו די חסידים אין אמעריקע איז גאר גרויס, איבערהויפט דארט וואו דער זיידע כ"ק אדמו"ר הרה"ק מבאיאן זי"ע האט געוואוינט און געפראוועט די עבודת הקודש. דער רבי שרייבט אז ער וואלט שטארק געוואלט קומען קיין אמעריקע באזוכן די חסידים אזוי ווי אמאל, אבער צוליב די שוועריגקייטן מיט וואס עס איז פארבינדן, האט ער נישט די מעגליכקייט דערצו אצינד.
דאן ווענדט זיך דער רבי צו די חסידים פון אמעריקע, מיט א בקשה אז זיי זאלן קומען צו פארן קיין ארץ ישראל להסתופף בצילו, פראווענען א שבת אינאיינעם בתוך אמוני עם סגולה, און צו די זעלבע צייט אפרעכטן א רייכע מעמד לטובת די מוסדות הקדושים דחסידי באיאן וואס זענען אנגעוויזן אויף הילף.
אין די יעצטיגע טעג איז באשטעטיגט געווארן אז דעם קומענדיגן פרשת יתרו וועט טאקע פארקומען די נסיעה מיטן נאמען "והביאני", וואו די הונדערטער חסידים תושבי ניו יארק וועלן קומען צו פארן קיין ארץ ישראל להסתופף בצל הקודש, און שבת פרשת יתרו וועט געפראוועט ווערן א גרויסע שבת ספעציעל פאר די חסידים פון אמעריקע, אין א פראכטפולע האטעל אין צפון ארץ ישראל.
