בחצר הקודש באיאן ווערט אין די יעצטיגע טעג פראקלאמירט די נייעס איבער א ערשטמאליגע און אייגענארטיגע כינוס ראשי המשפחות, וואס וועט צונויפברענגען די זקני החסידים די ראשי המשפחות, די עלטערע חסידים וואס טוען משפיע זיין אויף די אינגערע, די חסידים וואס האבן נאך זוכה געווען לחסות בצל הקודש פון כ"ק אדמו"ר הרה"ק רבי מרדכי שלמה מבאיאן זי"ע.
די אייגענארטיגע כינוס שטעלט אוועק דעם געדאנק פון שאל אביך ויגדך זקניך ויאמרו לך, ווען דערביי וועלן די זקני החסידים אויפוויקלען זייערע רייכע זכרונות בהלו נרו עלי ראשינו, די לעכטיגע תקופה בחיים חיותו פונעם באיאנער רבי'ן זצ"ל וועלכער האט משפיע געווען מהוד תורתו וצדקתו, וזכרו לא ימוש פון די חסידים אלע יארן, ווען די חסידים פונעם רבינ'ס דור טוען ווייטער איבערגעבן פאר די פרחי החסידים במשנתו של רבי.
אין בעפארברייטונג צו די זעלטענע כינוס פונעם רבינ'ס דור, וואס איז געפלאנט אויף קומענדיגן חודש אלול הבעל"ט, איז געעפנט געווארן א נייע טעלעפאן ליניע קו זכרון עולם, וואו די זקני החסידים טוען פארציילן פון זייערע לעכטיגע זכרונות ביים רבי'ן זצ"ל, אזוי אויך ערשיינט א רייע געדרוקטע שמועסן פון די חסידים וואס שילדערן רייכע זכרונות פון יענע לעכטיגע תקופה.
ביים גרויסן כינוס וועט ווערן אוועקגעשטעלט א נייע קרן צדקה מיטן נאמען "זכרון עולם", לזכר נשמתם פון די חשובע קינדער פרי עץ חיים, די זיהן פון כ"ק אדמו"ר מבאיאן זצ"ל וועלכע זענען אלע יארן געשטאנען מיט א געטריישאפט לטובת קהילות ומוסדות באיאן ברחבי תבל.
