א מעכטיגע קידוש השם האט זיך אפגעשפילט היינט אויף די הויפט גאסן אין עיר הבירה לאנדאן, ווען טויזענטער אידישע קינדער זענען ארויסגעקומען אין די מאסן ארויסצוהייבן א וויי געשריי קעגן די רדיפת הדת בארץ הקודש, כולם נקבצו ובאו מיט א פאראייניגטע שטימע קבל תבל ומלואה.
די גרויסע עצרת מחאה וזעקה איז אראנדזשירט געווארן על פי קריאת הקודש פון די שרי התורה חברי הביד"ץ העדה החרדית שבירושלים עיה"ק, אין צוזאמענארבעט מיט די הנהלת התאחדות קהילות החרדים אין לאנדאן, וואס נעמט אריין אלע קהילות הקודש פון די חסידישע קרייזן אין לאנדאן ענגלאנד אין א געמיינזאמע רוף פון די גדולי רבני העיר, די רבנים פון כדתיא, רבני קהילות סאטמאר, וויזניץ, סקווירא, באבוב, באבוב 45, פשעווארסק, מאחנובקא בעלזא, טשערנאביל, סלאנים, ביאלא, תולדות אהרן, און נאך פיל.
די גאסן פארנט פון די מדינת ישראל קאנסולאט אין לאנדאן סיטי, לענגאויס די פארנומענע קענזינגטאן גאס, איז שווארץ געווארן פון טויזענטער אידן פון אלע חרדישע געגנטער, א פלאטע פון באסעס האט געברענגט דעם ציבור, און אזוי אויך איז מען געקומען צו פארן מיט פאבליק טראנספארטאציע.
צוערשט האט אויפגעטרעטן דער יושב ראש הרה"ג ר' יחזקאל ווייס שליט"א פון מאנסי, און דערנאך האט אויפגעטרעטן מיט פייערדיגע ווערטער הגה"צ ר' משה מנחם ווייס שליט"א רב דקהל יטב לב ד'סאטמאר. דערנאך האט מען געהערט א פייערדיגע דרשה פון הגה"צ ר' ברוך נתן האלבערשטאם שליט"א רב דקהל יטב לב ד'סאטמאר, און א דרשה פון הגה"צ ר' לייבוש פאדווא שליט"א בנו הגדול פון הגה"צ גאב"ד לאנדאן שליט"א לרפואה שלימה, וועלכער האט אויך פארגעזאגט פרקי תהלים בהתעוררות רב.
עס האט אויפגעטרעטן הגה"צ ר' חיים פנחס מיללער שליט"א רב חסידי טשערנאביל, און הרה"ג ר' יעקב מארמארשטיין שליט"א רב דקהל אהל משה, וואס האט גערעדט פאר די פרעסע אויף די ענגלישע שפראך. צום שלוס האט מען געזאגט קבלת עול מלכות שמים, פארגעזאגט דורכ'ן זקן רבני ענגלאנד, הגה"צ ר' שלום פריעדמאן שליט"א סגן אב"ד לאנדאן.
אויסער די גדולי הרבנים וואס האבן משמיע געווען פייערדיגע דרשות, האבן זיך משתתף געווען פילצאליגע אדמור"י ורבני העיר, הגה"צ ר' בנציון בלום שליט"א דומ"ץ באבוב, הגה"צ ר' נפתלי אלימלך לייזער שליט"א אבד"ק פשעווארסק, הגה"צ ר' שמואל יעקב שרייבער שליט"א רב חסידי גור, הגה"צ ר' לייבל ווייס שליט"א ראש ישיבת מאחנובקא בעלזא, הגה"צ ר' מרדכי וויינבערג שליט"א רב חסידי סלאנים, הגה"צ ר' אשר ראבינאוויטש שליט"א אבד"ק פשיסחא, הגה"צ ר' מאיר שמואל שפיגל שליט"א אב"ד קאלושין, אדמו"ר מסטאניסלאוו אלעסק, דייני קהילות סאטמאר און נאך.
