אין די יעצטיגע טעג איז באשטעטיגט געווארן די פלענער איבער די יערליכע גרויסארטיגע סעודת הילולא ביומא דהילולא קדישא פונעם הייליגן בת עין זי"ע, וואס ווערט אפגעראכטן מיט גרויס התעוררות מדי שנה בשנה דורך הגה"צ המשפיע ר' אלימלך בידערמאן שליט"א מלעלוב, במעמד אלופי אלפי ישראל פון אלע שיכטן און קרייזן.
די גרויסארטיגע הילולא ציעט יערליך שווערע טויזענטער אידן וואס קומען זיך דערווארעמען בשבת אחים גם יחד, במשנתו פונעם הייליגן בת עין זי"ע. אין די פריערדיגע יארן פלעגט די מעמד פארקומען אין עיה"ק צפת סמוך ונראה צום ציון הק' פונעם בעל ההילולא, אבער אין די לעצטע פאר יאר ווען די ציבור המשתתפים איז דראסטיש געשטיגן, ווערט די מעמד אפגעראכטן אין אנדערע פלעצער אין צענטראלע שטעט אין ארץ ישראל.
אצינד איז באשטימט געווארן אז די גרויסארטיגע מעמד בליל ההילולא וואס געפאלט קומענדיגע וואך דאנערשטאג פרשת וישלח, וועט פארקומען אינעם ריזן היכל פון בית המדרש הגדול תולדות אהרן אין די מאה שערים געגנט אין ירושלים, וואס וועט צוגערישט ווערן מיט טויזענטער פלעצער צו קענען אקאמאדירן דעם ריזן ציבור וואס איז ערווארטעט.
תיכף נאכן סעודת הילולא וועט הגה"צ ר' אלימלך שליט"א ארויספארן קיין צפת צו מתפלל זיין ביים ציון הק' אינאיינעם מיט פילע חסידים ומעריצים. שבת קודש וועט ער פראווענען אויף א גרויסע פארנעם אין עיה"ק צפת, אינאיינעם מיט די אינגעלייט חברי חבורת באר האמונה.
