דינסטאג שופטים 5:50 נאכמיטאג - 12:50 ביינאכט אין ארץ ישראל
אין די יעצטיגע מינוטן איז די מיטה אנגעקומען צום הר הזיתים, ווען טויזענטער אידן באגלייטן מיט אראפגעלאזטע געמיטער, מען פירט אריין די מיטה אינעם אוהל הק' פון הרה"ק מקרעטשניף זי"ע וואו מען וועט דורכפירן די קבורה אין די קומענדיגע מינוטן.
אינעם אוהל הק' זענען אנוועזנד דער איינציגער ברודער פונעם רבי'ן כ"ק אדמו"ר מקרעטשניף שליט"א פון ירושלים, און זיין איידעם כ"ק אדמו"ר מפיטסבורג שליט"א, און נאך עטליכע אדמורי"ם און בני המשפחה.
דינסטאג שופטים 5:00 נאכמיטאג - 12:00 ביינאכט אין ארץ ישראל
מען האט יעצט פארענדיגט די הספדים אין ביהמ"ד, אין די קומענדיגע מינוטן וועט די מסע הלוויה ארויסגיין פון בית המדרש אויף רחוב ראפאפורט, מען וועט באגלייטן צופיס ביזן הר הזיתים, וואו דער רבי זצ"ל וועט קומען לקבורה אינעם אהל הק' פון אביו הגדול הרה"ק מקרעטשניף זי"ע.
דינסטאג שופטים 4:55 נאכמיטאג - 11:55 ביינאכט אין ארץ ישראל
הרה"ג ר' עקיבא וואזנער שליט"א מרבני הקהילה האט יעצט אויסגערופן רצון הקודש פונעם רבי'ן זצ"ל, אז בניו החשובים זאלן ווייטער ממשיך זיין דעם שלשלת הקודש.
בנו בכורו כ"ק אדמו"ר הרה"צ רבי נפתלי הירצקא יצחק שליט"א ווערט אויפגענומען אלס ממלא מקומו באדמורו"ת קרעטשניף סיגעט.
די אנדערע קינדער הרבנים הגאונים שליט"א ווערן אויך אויפגענומען אלס ממלאי מקומו בקודש צו משפיע זיין אויף די חסידים תורה ויראת שמים.
דערביי האט ער ממשיך געווען מיט א הארציגע רוף לכל הקהל הקודש, להרבות אהבה אחוה וריעות און זיך האלטן בשלום עד ביאת הגואל.
-------
דינסטאג שופטים 4:40 נאכמיטאג - 11:40 ביינאכט אין ארץ ישראל
יעצט איז מספיד הרה"ג ר' עקיבא וואזנער שליט"א מרבני הקהילה.
פריער האט מספיד געווען הרב יואל ארי' שטערן שליט"א פון מאנסי, פון די גאר נאנטע מקורבים ביים רבי'ן זצ"ל.
-------
דינסטאג שופטים 4:30 נאכמיטאג - 11:30 ביינאכט אין ארץ ישראל
יעצט איז מספיד דער משמש בקודש הרב שמואל אייכל הי"ו.
פריער האט מספיד געווען הגה"צ ר' יחזקאל שרגא בראך שליט"א ראה"כ תולדות אברהם יצחק, איידעם ביי כ"ק אדמו"ר מתולדות אברהם יצחק שליט"א, א שוואגער מיטן רבי'ן זצ"ל בזיווג שני. אויך האט מספיד געווען דורך א הוקאפ דעם רבינ'ס איידעם הגה"צ ר' ישראל הורוויץ שליט"א, אייניקל פון כ"ק אדמו"ר ממעליץ שליט"א.
--------
דינסטאג שופטים 4:10 נאכמיטאג - 11:10 ביינאכט אין ארץ ישראל
יעצט איז מספיד דורך א לייוו הוקאפ, כ"ק אדמו"ר מביאלא בני ברק שליט"א, דער איינציגסטער איידעם פונעם רבינ'ס פאטער הרה"ק מקרעטשניף זי"ע, וועלכער געפונט זיך די טעג אין ניו יארק.
פריער האט מספיד געווען דער יונגסטער איידעם פונעם רבי'ן זצ"ל, הרב אהרן טייטלבוים שליט"א, אייניקל פון כ"ק האדמורי"ם מסאסוב און פינסק קארלין שליט"א.
-------
דינסטאג שופטים 4:00 נאכמיטאג - 11:00 ביינאכט אין ארץ ישראל
יעצט איז מספיד דורך א לייוו הוקאפ, דעם רבינ'ס איידעם הגה"צ ר' דוד צבי קאהן שליט"א אבד"ק תולדות אברהם יצחק בית שמש, בן כ"ק אדמו"ר מתולדות אברהם יצחק שליט"א, וועלכער שטייט אינדרויסן פון ביהמ"ד זייענדיג א כהן.
-------
דינסטאג שופטים 3:50 נאכמיטאג - 10:50 ביינאכט אין ארץ ישראל
יעצט טרעט אויף מיט דברי הספד דעם רבינ'ס איידעם הגה"צ ר' משה שמואל ראטטענבערג שליט"א מנהל פון מוסד אור חדש, אין די פריערדיגע מינוטן האבן אויפגעטרעטן מיט דברי הספד צוויי איידימער פונעם רבי'ן, הגה"צ ר' חיים אלי' יואל איליאוויטש שליט"א, און הגה"צ ר' חיים מאיר שנעעבאלג שליט"א אבד"ק סטרעליסק.
-------
דינסטאג שופטים 3:40 נאכמיטאג - 10:40 ביינאכט אין ארץ ישראל
יעצט טרעט אויף מיט דברי הספד דורך א לייוו הוק אפ, דעם רבינ'ס איידעם הגה"צ ר' אהרן קאהן שליט"א אבד"ק תולדות אהרן מאנסי, בן כ"ק אדמו"ר מתולדות אהרן שליט"א.
פריער האבן מספיד געווען די קינדער הגה"צ ר' ניסן חיים מרדכי ראזענבוים שליט"א, הגה"צ ר' מאיר ארי' לייב ראזענבוים שליט"א פון בארא פארק, און הגה"צ ר' יואל זוסמאן ראזענבוים שליט"א פון קרית טאהש..
אחיו הגדול פונעם רבי'ן זצ"ל כ"ק אדמו"ר מקרעטשניף שליט"א פון ירושלים, איז אנגעקומען בשכינות צום ביהמ"ד צו מיטהאלטן די מסע הלוויה בראש קהל חסידיו.
-------
דינסטאג שופטים ביינאכט אין ארץ ישראל
מען גרייט צו די מקום הקבורה, נעבן דעם ציון הק' פון זיין גרויסן פאטער הרה"ק מקרעטשניף זי"ע, אינעם אוהל הק' אויפן הר הזיתים
------
דינסטאג שופטים 3:00 נאכמיטאג - 10:00 ביינאכט אין ארץ ישראל
בנו הגדול פונעם רבי'ן זצ"ל הגה"צ רבי נפתלי הירצקא יצחק ראזענבוים שליט"א אבד"ק קרעטשניף סיגעט בית שמש האט יעצט אויפגעטרעטן מיט קורצע דברי הספד.
יעצט טרעט אויף מיט יאמערליכע דברי הספד דער צווייטער זון הגה"צ רבי יחזקאל שרגא שליט"א אבד"ק קרעטשניף סיגעט וומס"ב.
------
דינסטאג שופטים 2:50 נאכמיטאג - 9:50 ביינאכט אין ארץ ישראל
דער גבאי ביהמ"ד הרה"ח ר' אלעזר פריעדמאן הי"ו טרעט אויף מיט דברי הספד, אין די צייט וואס די קינדער הרבנים הגאונים שליט"א קומען יעצט אריין אין ביהמ"ד. נעבן די מיטה געפונען זיך כ"ק אדמו"ר ממעליץ פון אשדוד, און הגה"צ אבד"ק סערדאהעלי פון בית שמש.
פילע אידן חסידים ואנשי מעשה האבן געריסן קריעה אויף די גרויסע אבידה, און די שרעקליכע יתמות שרייט ארויס פון אלע ווינקלען.
------
דינסטאג שופטים 2:30 נאכמיטאג - 9:30 ביינאכט אין ארץ ישראל
בבכי ומספד געפונען זיך הונדערטער אידן פארזאמלט אין ביהמ"ד קרעטשניף סיגעט, וואו די מיטה פונעם רבי'ן זצ"ל געפונט זיך שוין אין ביהמ"ד צום אנהייב פון די מסע הלוויה, מען זאגט יעצט סליחות מיט גרויס התעוררות בבכי תמרורים.
------
דינסטאג שופטים 1:00 מיטאג - 8:00 פארנאכטס אין ארץ ישראל
יעצט איז ענדגילטיג באשטעטיגט געווארן אז די מסע הלוויה וועט פארקומען אין אנדערטהאלבן שעה ארום, ניין דרייסיג אויפדערנאכט, בהיכל ביהמ"ד קרעטשניף סיגעט אויף רחוב ראפאפורט אין די בית ישראל געגנט אין ירושלים, און פ ון דארט וועט מען באגלייטן דעם ארון הקודש ביז צום הר הזיתים, וואו דער רבי זצ"ל וועט קומען לקבורה נעבן זיין גרויסן פאטער הרה"ק מקרעטשניף זי"ע.
------
דינסטאג שופטים 12:45 מיטאג - 7:45 פארנאכטס אין ארץ ישראל
די צוגרייטונגען צו די מסע הלוויה ווערן געמאכט ברחובות העיר ירושלים, און אין ביהמ"ד קרעטשניף סיגעט אויף רחוב ראפאפורט, אין די פריערדיגע מינוטן האט מען ארויסגעפירט די מיטה פון ביהמ"ד צום דערנעבענדיגן זוועהילער בית המדרש וואו מען רעכט אפ די טהרה.
-----
דינסטאג שופטים 11:15 פארמיטאג - 6:15 נאכמיטאג אין ארץ ישראל
די מיטה פונעם רבי'ן זצ"ל איז שוין אריינגעברענגט געווארן אין ביהמ"ד קרעטשניף סיגעט אויף רחוב ראפאפורט, הונדערטער אידן זענען פארזאמלט און געזעגענען זיך בבכיות נוראות, זיך גרייטענדיג צו די מסע הלוויה וואס וועט פארקומען אין די קומענדיגע שעות.
-------
דינסטאג שופטים 10:45 פארמיטאג - 5:45 נאכמיטאג אין ארץ ישראל
די שרעקליכע טרויער און יתמות שפירט זיך אויף די גאסן אין ירושלים עיה"ק, מיטן הסתלקות לשמי מרום פון כ"ק אדמו"ר מקרעטשניף סיגעט זכר צדיק וקדוש לברכה, אין די יעצטיגע שעות ווערן געמאכט די פיבערהאפטיגע הכנות צו די גרויסע לוויה בחוצות ירושלים, וואס וועט פארקומען היינט דינסטאג נאכט בבית מדרשו של רבי אויף די ראפאפורט גאס אין די בית ישראל געגנט אין ירושלים.
