די שרעקליכע יתמות און טרויער וואס האט זיך אראפגעלאזט אויף די חסידישע וועלט, האט זיך שטארק געשפירט בחוצות ירושלים, ווען טויזענטער אידן האבן זיך פארזאמלט לחלוק כבוד האחרון פארן רועה נאמן ומלהיב לבבות ישראל, כ"ק אדמו"ר מקרעטשניף סיגעט זכר צדיק לברכה, וועלכער איז נסתלק געווארן לגנזי מרומים נעכטן נאכמיטאג אין ארץ ישראל, אין בליענדן עלטער פון פינף און זיבעציג יאר.
די מיטה פונעם רבי'ן זצ"ל איז אריינגעברענגט געווארן אין ביהמ"ד קרעטשניף סיגעט אויף רחוב ראפאפורט אין די בית ישראל געגנט אין ירושלים, ווען די פילע אנוועזנדע האבן אויסגעבראכן אין א יאמערליכע געוויין, און זיך געזעגנט מיט בכיות נוראות. דערנאך איז די מיטה געפירט געווארן צום זוועהילער בית המדרש אין די בית ישראל געגנט וואו מען האט אפגעראכטן די טהרה כנהוג.
ניין דרייסיג אויפדערנאכט האט זיך אנגעהויבן די גרויסע לוויה בבית מדרשו של רבי, צוערשט האט הרב החסיד ר' מאניש בערגער הי"ו מגבאי הביהמ"ד פארגעזאגט פרקי תהלים און סליחות בקול ראש חזק, און דערנאך האט זיך אנגעהויבן די הספדים, לויטן פאלגענדן סדר:
דער גבאי ביהמ"ד הרה"ח ר' אלעזר פריעדמאן הי"ו, בנו הגדול פונעם רבי'ן זצ"ל הגה"צ רבי נפתלי הירצקא יצחק ראזענבוים שליט"א אבד"ק קרעטשניף סיגעט בית שמש, דער צווייטער זון הגה"צ רבי יחזקאל שרגא שליט"א אבד"ק קרעטשניף סיגעט וומס"ב, די אנדערע זיהן הגה"צ ר' ניסן חיים מרדכי ראזענבוים שליט"א, הגה"צ ר' מאיר ארי' לייב ראזענבוים שליט"א פון בארא פארק, און הגה"צ ר' יואל זוסמאן ראזענבוים שליט"א פון קרית טאהש. די איידימער פונעם רבי'ן הגה"צ ר' אהרן קאהן שליט"א אבד"ק תולדות אהרן מאנסי, בן כ"ק אדמו"ר מתולדות אהרן שליט"א, הגה"צ ר' חיים מאיר שנעעבאלג שליט"א אבד"ק סטרעליסק, הגה"צ ר' משה שמואל ראטטענבערג שליט"א מנהל פון מוסד אור חדש, הגה"צ ר' דוד צבי קאהן שליט"א אבד"ק תולדות אברהם יצחק בית שמש, בן כ"ק אדמו"ר מתולדות אברהם יצחק שליט"א, הגה"צ ר' חיים אלי' יואל איליאוויטש שליט"א, און דער יונגסטער איידעם פונעם רבי'ן זצ"ל, הרב אהרן טייטלבוים שליט"א, אייניקל פון כ"ק האדמורי"ם מסאסוב און פינסק קארלין שליט"א.
דערנאך האבן מספיד געווען כ"ק אדמו"ר מביאלא בני ברק שליט"א, דער איינציגסטער איידעם פונעם רבינ'ס פאטער הרה"ק מקרעטשניף זי"ע, דעם רבינ'ס איידעם הגה"צ ר' ישראל הורוויץ שליט"א, אייניקל פון כ"ק אדמו"ר ממעליץ שליט"א, הגה"צ ר' יחזקאל שרגא בראך שליט"א ראה"כ תולדות אברהם יצחק, איידעם ביי כ"ק אדמו"ר מתולדות אברהם יצחק שליט"א, א שוואגער מיטן רבי'ן זצ"ל בזיווג שני, דער משמש בקודש הרב שמואל אייכל הי"ו, הרב יואל ארי' שטערן שליט"א פון מאנסי, פון די גאר נאנטע מקורבים ביים רבי'ן זצ"ל, און הרה"ג ר' עקיבא וואזנער שליט"א מרבני הקהילה.
הרה"ג ר' עקיבא וואזנער שליט"א האט אויסגערופן רצון הקודש פונעם רבי'ן זצ"ל, אז בניו החשובים זאלן ווייטער ממשיך זיין דעם שלשלת הקודש. בנו בכורו כ"ק אדמו"ר הרה"צ רבי נפתלי הירצקא יצחק שליט"א ווערט אויפגענומען אלס ממלא מקומו באדמורו"ת קרעטשניף סיגעט. און די אנדערע קינדער הרבנים הגאונים שליט"א ווערן אויך אויפגענומען אלס ממלאי מקומו בקודש צו משפיע זיין אויף די חסידים תורה ויראת שמים. דערביי האט ער ממשיך געווען מיט א הארציגע רוף לכל הקהל הקודש, להרבות אהבה אחוה וריעות און זיך האלטן בשלום עד ביאת הגואל.
צווישן די פילע משתתפים האבן זיך אנגעזעהן כ"ק האדמורי"ם מתולדות אברהם יצחק און תולדות אהרן, דער איינציגער ברודער פונעם רבי'ן כ"ק אדמו"ר מקרעטשניף שליט"א פון ירושלים בראש קהל חסידיו, כ"ק האדמורי"ם מקרעטשניף, פינסק קארלין, זוועהיל, פרימישלאן, זוטשקא, מעליץ, ראחוב, ספינקא, ווערדאן פון ירושלים, מעזיבוזש, גאב"ד סערדאהעלי בית שמש און נאך.
נאכן רייסן קריעה און זיך געזעגענען, איז די מסע הלוויה ארויס פון בית המדרש אויף רחוב ראפאפורט, מען האט באגלייט צופיס ביזן הר הזיתים, וואו דער רבי זצ"ל איז געקומען לקבורה אינעם אהל הק' פון אביו הגדול הרה"ק מקרעטשניף זי"ע.
