בחצר הקודש קרעטשניף סיגעט גרייט מען זיך אויף א גרויסארטיגן שבת הכתרה, ווען עס וועט געפראוועט ווערן די ערשטע שבת בצל כ"ק האדמורי"ם מקרעטשניף סיגעט שליט"א, וואס זענען די וואך נתעלה געווארן בכתר האדמורו"ת, ביים מסע הלוויה פון זייער גרויסן פאטער כ"ק אדמו"ר מקרעטשניף סיגעט זכר צדיק לברכה.
די שרעקליכע פארלוסט שפירט זיך אין יעדן ווינקל, ווען די פילצאליגע חסידים ומעריצים טרייסטן זיך שווער נאכן רבינ'ס הסתלקות, ווען בלויז א וואך צוריק האט דער רבי נאך געפראוועט די חסידים ווי געווענליך, און דעם פארגאנגענעם שבת איז דער רבי נאך אריינגעקומען צו תפילת מנחה בהיכל בית מדרשו בשלהבת אש קודש, געציילטע מינוטן בעפאר ער איז פלוצלינג צוזאמגעפאלן אויפן לעצטן וועג בעוונותינו הרבים.
זיך גרייטענדיג צום ערשטן שבת בצל בניו ממשיכי דרכו, בנו הגדול כ"ק אדמו"ר מקרעטשניף סיגעט שליט"א, און אלע אנדערע ברידער כ"ק האדמורי"ם שליט"א, איז באשטעטיגט געווארן מטעם די גבאי הקהילה אז די שבת וועט געפראוועט ווערן אין א גרעסערע לאקאל, נאך וואס לויט די ריזן ציבור וואס איז ערווארטעט זיך צו טרייסטן בצל כ"ק האדמורי"ם שליט"א, איז נישט מעגליך צו אקאמאדירן די תפילות און טישן אינעם קרעטשניף סיגעטער בית המדרש אין די בית ישראל געגנט.
נישט ווייט פון בית המדרש, אינעם גרויסן שאטער ביי ביהמ"ד פינסק קארלין אויף רחוב בית ישראל, וועט געפראוועט ווערן די געהויבענע שבת הכתרה, ווען די ברידער האדמורי"ם וועלן פירן די תפילות און טישן, און ממשיך זיין מסורת אביהם אריינצושיינען דעם קדושת שבת אין אידישע הערצער, אויפצופלאקערן אידישע קינדער לאביהם שבשמים אויפן קרעטשניפער נוסח.
פרייטאג צונאכטס וועט מען יא דאווענען בבית מדרשו של רבי, דארט צווישן די ווענט וואו דער רבי זצ"ל האט געגעבן דעם לעצטן בליק מיט גענוי א וואך פריער, און אלע אנדערע תפילות, טיש פרייטאג צונאכטס און שלש סעודות, וועט געפראוועט ווערן אויף א גרויסע פארנעם אין די פינסק קארלינער שאטער.
