אפדעיט מיטוואך וירא 12:00 מיטאג
יעצט זיבן אזייגער פארנאכטס אין ארץ ישראל, הערט מען ב"ה די גוטע בשורה אז דער רבי שליט"א איז נארוואס באפרייט געווארן פון שפיטאל, און געפונט זיך שוין אויפן וועג אהיים לביתו נאוה קודש אין די מאה שערים געגנט אין ירושלים.
-------
פון די הדסה שפיטאל אין ירושלים וואו כ"ק אדמו"ר מתולדות אברהם יצחק שליט"א לרפו"ש געפונט זיך די לעצטערע טעג, הערט מען ב"ה עטוואס בעסערע נייעס, אז די דאקטוירים קוקן ארויס אויף פאזיטיווע אנטוויקלונגען, און גרייטן זיך צו באפרייען דעם רבי'ן זיך אומצוקערן אהיים לביתו נאוה קודש, שוין אזוי פרי ווי היינט אויפדערנאכט.
דער רבי שליט"א איז שפיטאליזירט שוין איבער א וואך, און פלאגט זיך מיט שווערע יסורים און א קאמפליצירטע אינפעקציע, טראץ וואס מיט עטליכע טעג צוריק האט די מצב אויסגעזעהן הילפסלאז, זענען אבער הויכראנגיגע פראפעסיאנאלע דאקטוירים אריינגעקומען אין בילד און אונטערגענומען פרישע באהאנדלונגען, וואס צייגט ב"ה אויף פאזיטיווע פארשריט.
נעכטן דינסטאג איז ווי באריכטעט פארגעקומען א גרויסארטיגע מעמד עצרת תפילה והתעוררות אין ביהמ"ד הגדול תולדות אברהם יצחק, וואו עס האט אויפגעטרעטן הגה"צ המשפיע ר' אלימלך בידערמאן שליט"א מלעלוב, צווישן אנדערע האט ער איבערגעגעבן א גריס פון שפיטאל זאגענדיג אז יעצט בשעת די עצרת תפילה איז פארגעקומען א אסיפה פון די דאקטוירים אין שפיטאל, און דערביי איז צוריקגעקומען די רעזולטאטן פון די פרישע באהאנדלונגען וואס צייגט ב"ה אויף פאזיטיווע פארשריט, און דעריבער האפט מען אז דער רבי וועט זיך שוין קענען אומקערן אהיים אין די נאנטע טעג.
מיט נאך א טאג פארביי האבן די דאקטוירים געמאלדן היינט אז נאכדעם וואס מען זעהט א שטארקע פארבעסערונג אינעם מצב הבריאות ב"ה, וועט דער רבי שליט"א זיך שוין קענען אומקערן אהיים לביתו נאוה קודש נאך היינט נאכט, און ביים רבי'ן אינדערהיים וועט מען פארזעצן די באהאנדלונגען ביז דער רבי וועט זיך בעז"ה צוריקקערן צו די כוחות בבריות גופא ונהורא מעליא.
