שטייענדיג אין א צייט וואס די מדינת ישראל רעגירונג טוט אויף פארשידענע וועגן אינפארסירן די שרעקליכע גזירה פון גיוס בני הישיבות רח"ל, און טוט נאכאנאנד איינשפארן נאך און נאך בחורים און אינגעלייט פארן איינציגן זינד פון זיך נישט שטעלן צום מיליטער, איז אין די יעצטיגע טעג געמאלדן געווארן איבער א פרישע רייזע לטובת די קרן עולם התורה בארה"ק, וואס שטעלט צו פינאנציעלע שטיצע פאר די ישיבות און כוללים וואס זענען אפעקטירט צוליב די גזירת הגיוס.
שוין צוויי יאר איז אריבער זינט די גדולי ראשי הישיבות האבן מייסד געווען דעם קרן עולם התורה, מיטן ציהל צו שאפן הונדערטער מיליאנען צו קענען פינאנצירן די ישיבות און כוללים וואס האבן פארלוירן רעגירונגס שטיצע צוליב די גזירת הגיוס, ווען די תלמידי הישיבה שטעלן זיך נישט צו צו זייערע פארלאנגען. דורכאויס די צוויי יאר זענען די זקני גדולי ראשי הישיבות ארויסגעפארן עטליכע מאל קיין חוץ לארץ און דורכגעפירט ריזיגע אקציעס שאפנדיג הונדערטער מיליאנען, וואס האט טאקע געגעבן דעם שטופ פאראויס אז די ישיבות און כוללים זאלן קענען אנגיין.
אצינד ווען די גזירת הגיוס איז ווידער אויפן טיש, ווען די מדינת ישראל רעגירונג טוט רודפ'ן לומדי תורה ווי קיינמאל בעפאר, האבן די גדולי ראשי הישיבות באשלאסן פה אחד צו ממשיך זיין מיט די מסירת נפש, און אליינס שאפן דאס געלט צו קענען פינאנצירן די ישיבות און כוללים, דעריבער איז באשטימט געווארן די פלענער פאר די בעפארשטייענדע מסע גדולי עולם התורה, צו שאפן פרישע געלטער לטובת די קרן עולם התורה.
די יעצטיגע נסיעה איז באשטימט אויף פרשת בהר בחוקותי אין די וואך נאך ל"ג בעומר, ווען די זקני גדולי הדור וועלן ארויספארן קיין דרום אמעריקע, צוערשט קיין בראזיל, און פון דארט קיין ארגענטינא, עס וועט פארקומען א רייע מעמדים און כינוסים, קבלת פנימ'ס און רייכע באנקעטן, אין שפיץ פון די חשובע געסט די גדולי עולם התורה, הגאון הגדול רבי משה הלל הירש שליט"א ראש ישיבת סלאבאדקע, הגאון הגדול רבי אברהם סאלים שליט"א ראש ישיבת מאור התורה, הגאון הגדול רבי יעקב הלל שליט"א ראש ישיבת אהבת שלום, און הגאון הגדול רבי שמעון גלאי שליט"א.
