חסידי מאחנובקא בעלזא אין ירושלים עיה"ק האבן אין די יעצטיגע טעג אין א מזל'דיגע שעה באנייעט א משכן קבע פארן בית המדרש, נאך עטליכע יאר וואס די חברי הקהילה זענען אריבער גולה אחר גולה אן קיין קביעות'דיגע בית המדרש.
די קהילה גייט שוין אן פאר דרייסיג יאר בליעה"ר, און איז גאר שטארק געוואקסן אין די לעצטערע יארן, ציילנדיג שוין היינט ארום צוויי הונדערט משפחות בליעה"ר, א תלמוד תורה און א ישיבה קטנה מיט נאך פילע אפטיילונגען, און גאנץ לעצטנס האט כ"ק אדמו"ר ממאחנובקא בעלזא שליט"א אויפגענומען זיין זון הגה"צ ר' אהרן רוקח שליט"א לכהן פאר אלס רב פון די קהילה.
נאך לענגערע הארעוואניע האבן די עסקני הקהילה אונטערגעשריבן א לאנגיעריגע ליעס פאר א משכן קבע פארן בית המדרש, אין א הערליכע לאקאל אויף רחוב עלי הכהן, וואס פארמאגט א גרויסן היכל מיט זייטיגע שטיבלעך, א שמחה זאל און נאך גוטע איינריכטונגען, און לכבוד די פתיחת שערים וחנוכת הבית איז כ"ק אדמו"ר ממאחנובקא בעלזא שליט"א אנגעקומען קיין ירושלים עאאיה"ק קובע צו זיין די מזוזות און פראווענען א מסיבת לחיים.
דער רבי שליט"א איז אנגעקומען אין די נייע ביהמ"ד דאנערשטאג נאכט ליל ר"ח אלול, קובע געווען א מזוזה ביים הויפט אריינגאנג, און דערנאך געפראוועט א לחיים טיש. דער רבי שליט"א האט אויפגעטרעטן מיט דברות קודש און זיך הארציג באדאנקט פאר די עוסקים במלאכת הקודש וואס האבן געהאלפן צו ברענגען דעם פראיעקט לידי גמר.
דערנאך האט אויפגעטרעטן דעם רבינ'ס זון הגה"צ ר' אהרן רוקח שליט"א רב הקהילה, און מען האט זיך ארויסגעלאזט אין פרייליכע טענץ. עס האט נאכגעפאלגט מיט א פרייליכע שבת חנוכת הבית דעם שבת פרשת שופטים, די מעמד הכנסת ספרי תורה ערב שבת פארן זמן, און א גרויסע קידוש שבת אינדערפרי לרגל המאורע.
