א שווערע פייער האט פאסירט די נאכט אין קרית טאהש קאנאדע, ווען די בוילער רום בבנין ביהמ"ד הגדול אין שטעטל האט אנגעהויבן ברענען, און די פייער האט פאראורזאכט שווערע שאדן פארן בנין בית המדרש.
די פייער האט פאסירט ארום צען אזייגער ביינאכט, עס האט זיך אנגעהויבן ווען א עלעקטעריק שטאנג אין די בוילער רום איז געווארן איבערגעהיצט און אנגעהויבן ברענען, און א גאר שווערע רויעך האט זיך פארשפרייט אין גרויסע טיילן פונעם בנין בית המדרש. די פייערלעשער זענען אלארמירט געווארן און געארבעט צו פארלעשן די פייער, אין די צייט וואס די בנין ביהמ"ד האט געליטן שווערע שאדן סיי פון די פייער און סיי פון די אויסלעש מיטלען.
מטעם קהל אור החיים ד'טאהש איז געמאלדן געווארן אז אין ליכט פון די פייער איז די בנין בית המדרש פולקאם פארשלאסן, און מען וועט נישט קענען דאווענען דעם שבת אינעם גרויסן בית המדרש. עס וועט זיין צוויי באזונדערע גרויסע מנינים, איינס אין די בית צירל זאל, און נאך איינס אין ביהמ"ד אברכים.
כ"ק אדמו"ר מטאהש שליט"א וועט פראווענען דעם שבת אין זאל בית צירל, וואו עס וועט אויך געפראוועט ווערן דעם שבת של שמחה, שמחת השבע ברכות פון א אייניקל ביים רבי'ן שליט"א.
