אין די יעצטיגע ימי החנוכה, נאך וואס כ"ק אדמו"ר מוויזניץ שליט"א פון לאנדאן האט זיך אהיימגעקערט לביתו נאוה קודש, נאכן אפרעכטן א געהויבענע באזוך בקרב חסידיו אין שטאט אנטווערפן, האט דער רבי שליט"א אפגעשריבן א מכתב קודש ספעציעל פאר די אנטווערפענער אידנטום, צו מחזק זיין די גדרי הצניעות ביי ארטיגע תושבי העיר.
דער רבי שליט"א שרייבט אינעם בריוו אז זייענדיג אין שטאט איז ער פארבעטן געווארן דורך די רבני העיר צו מעורר זיין דעם ציבור בעניני צניעות, נאך וואס כ"ק אדמו"ר מפשעווארסק שליט"א האט מיט עטליכע חדשים צוריק אפגעשריבן א מכתב קודש פאר די תושבי העיר זיך צו מחזק זיין בעניני צניעות, אין ליכט פון לעצטיגע פירצות אין דעם ענין.
דער רבי ברענגט ארויס אינעם בריוו די געוואלדיגע הארעוואניע וואס די פריערדיגע צדיקים האבן אריינגעלייגט צו מדריך זיין די חסידים און תלמידים צו אפהיטן די גדרי הצניעות, אבער ליידער זעהט מען לעצטנס ווי עס ווערט פארשפרייט געוויסע פירצות און רוח הפקרות, אויף גאר יסודות'דיגע ענינים וואס מען איז געוואוינט צו אכטונג געבן אלע יארן. דעריבער דארף מען זיך שטארק מחזק זיין אין די ענינים.
דער רבי לייגט צו א ספעציעלן דאנק פאר די אלע נשים צדקניות וואס האבן זיך פארגענומען קבלות טובות אין דעם געביט, ווען דער רבי איז געלעגן על ערש דוי, אלס א זכות פארן רבינ'ס רפואה, דער אויבערשטער זאל זיי באצאלן בכפלי כפליים.
