א ערנסטע הלכה'דיגע פאלעמיק האט זיך אפגעשפילט דעם פרייטאג פארמיטאג אויף די בארא פארקער גאסן, נאך וואס עס איז אנטדעקט געווארן א ערנסטע פראבלעם פון אוהל הטומאה אויף די פארנומענע מעקדאנאלד עוועניו אין בארא פארק, צוליב א צייטווייליגע קאנסטרוקציע דאך וואס האט צוגעברענגט א איסור פאר כהנים צו גיין אויפן גאס.
דעם פרייטאג אינדערפרי איז געווארן ארויסגעשטעלט א דריגענדע מעלדונג מטעם וועד משמרת כהונה, וואס גיבט זיך אפ רונדע דעם יאר צו פארזיכערן און באגלייטן כהנים פון סיי וועלכע חשש טומאת אוהל, און ווערט געפירט דורך די חשובע רבני הוועד, כ"ק אדמו"ר מסערדאהעלי שליט"א, און כ"ק גאב"ד פאלטישאן שליט"א, די ווארענונג האט געלויטעט אז כהנים מעגן נישט פארן אויף מעקדאנאלד עוועניו, פון קארטעליו ראוד ביז די קאוני איילענד געגנט וואו די באן שינעס העכער די גאס קומט צו אן ענדע.
די פראבלעם וואס האט זיך געשאפן איז צוליב קאנסטרוקציע ארבעט ביי די באן שינעס, ווען די ארבייטערס האבן אויפגעשטעלט א צייטווייליגע דאך אונטער די באן שינעס העכער די גאס, און די דאך שפרייט זיך אויס העכער די וואשינגטאן סעמעטערי, וואס ברענגט אז עס זאל זיין א אוהל הטומאה פון העכער די בית הקברות ביז העכער די גאס וואו קארס פארן, דעריבער איז פשוט אן איסור פאר כהנים צו פארן אויף מעקדאנאלד עוועניו, סיי דורך קארס אדער באסעס, און סיי דורכ'ן שפאצירן צופיס.
די רבנים און עסקנים האבן זיך באלד אריינגעלאזט אין העפטיגע שתדלנות און ארבעט מיט די שטאטישע אויטאריטעטן צו לעזן דעם פראבלעם, וואוסענדיג אז ווילאנג די פראבלעם איז אקטיוו זענען כהנים נישט ערלויבט צו דורכגיין דעם גאס, און עס האנדלט זיך פון א שטארק פארנומענע גאס וואס איז נישט שטענדיג מעגליך אויסצוקרויזן.
נאך עטליכע אנגעצויגענע שעות איז ב"ה געמאלדן געווארן די פרייליכע אנטוויקלונג אז די פראבלעם איז געלעזט געווארן, נאך וואס די רבנים און עסקנים, אין שפיץ פון הגה"צ גאב"ד פאלטישאן שליט"א, הגה"צ ר' חיים משה רוקח שליט"א אבד"ק יעריסלאוו, און דער היימישער אסעמבלימאן ר' שמחה אייכענשטיין הי"ו, זענען אראפגעקומען אויפן סצענע אינאיינעם מיט די באאמטע, און פארראכטן די דאך מיט אלע הידורים עס זאל זיך נישט אריינשטעקן העכער די בית הקברות.
