חסידי סקווירא אין מאנסי זענען מיט פרייד נתבשר געווארן איבער די פרייליכע מקח וואס איז געשלאסן געווארן די וואך, מיטן אפקויף פון א משכן קבע פאר די סקווירא שטיבל אין די וויאולע געגנט אין מאנסי, א שטח רחבת ידים מיט א בנין דערויף וואו די קהילה וועט זיך בעז"ה אריינציען אין די נאנטע צוקונפט.
מיט איבער פיר יאר צוריק, שבת נחמו תשפ"ב, איז די סקווירא וואיאולע שטיבל אין מאנסי געעפנט געווארן אין א מזל'דיגע שעה, און איז ביזדערווייל געווען איינקוואטירט אינעם בנין פון תלמוד תורה פאפא אויף ווידמען קאורט. אצינד נאך וואס די עסקני הביהמ"ד האבן געזוכט א פאסיגע לאקאל פאר א משכן קבע, האט מען בשעה טובה ומוצלחת געשלאסן קאנטראקט אויף א שיינע שטח און א בנין דערויף, וואס געפונט זיך אויף 136 יוניאן ראוד.
פארגאנגענע וואך זענען די עסקני הביהמ"ד אינאיינעם מיטן דיין הרה"ג ר' בנימין זאב שפיטצער שליט"א אריין אל הקודש פנימה צו כ"ק אדמו"ר מסקווירא שליט"א, איבערגעבן די פרייליכע בשורה און מקבל זיין ברכת הקודש, דער רבי האט גאר ווארעם געוואונטשן די עסקנים מען זאל ווייטער זעהן הצלחה און סייעתא דשמיא. אזוי אויך איז פארגעקומען א מסיבת לחיים אין די שטיבל לרגל המאורע.