כ"ק אדמו"ר מקאפיטשניץ שליט"א וועלכער ווערט היינט פאררעכנט אלס דער זקן אדמור"י בית רוזין, און פון די חשובע אדמורי"ם בעיר הקודש ירושלים, איז ערווארטעט אנצוקומען די וואך אויף א באזוך בקרב חסידיו אין ניו יארק, צו באשיינען די שמחת החתונה פון א אייניקל וואס קומט פאר די קומענדיגע וואך.
דער רבי וועט וויילן אין ניו יארק פאר איבער צוויי וואכן, די ערשטע שבת פרשת וירא וועט דער רבי פראווענען אין שטאט סטעטן איילענד, אין ביהמ"ד אור מאיר קאפיטשניץ אין שטאט וואס ווערט געפירט דורכ'ן רבינ'ס זון הגה"צ ר' שלמה חיים פלינטנשטיין שליט"א. מוצאי שבת וועט פארקומען א גרויסע מלוה מלכה לטובת די קרן הבנין פון ביהמ"ד קאפיטשניץ אין סטעטן איילענד.
די נאכפאלגענדע שבת פרשת חיי שרה וועט דער רבי פראווענען אין שטאט לעיקוואד, אין ביהמ"ד אור יהושע קאפיטשניץ אין שטאט וואס ווערט געפירט דורכ'ן רבינ'ס זון הגה"צ ר' יהושע העשיל פלינטנשטיין שליט"א. אינאיינעם מיט די שבת של שמחה במעון הקודש פונעם רבי'ן, שמחת השבע ברכות בבית בנו הגה"צ ר' יהושע העשיל שליט"א אב"ד קאפיטשניץ לעיקוואד.
מיטוואך חיי שרה וועט פארקומען די שמחת החתונה פון א אייניקל ביים רבי'ן, די כלה א טאכטער פון זיין זון הגה"צ ר' יהושע העשיל שליט"א, מיט די חתן א זון פון הגה"צ ר' דוד אלימלך פינטער שליט"א, איידעם ביי כ"ק אדמו"ר מביאלא לאנדאן שליט"א. די חתונה וועט פארקומען אין זאל כתר משה יהודה אין לעיקוואד.
