מיט גרויס צער און טרויער איז אנגעקומען היינט די שווערע בשורה, איבער די פטירה פון הגאון הצדיק המפורסם רבי ישראל אליעזר האגער זצ"ל, אבד"ק סערט וויזניץ אין ירושלים עיר הקודש, וועלכער האט זיך ליידער געמוטשעט מיט שווערע יסורים פאר לאנגע יארן, און איז היינט נפטר געווארן אין עלטער פון דריי און זיבעציג יאר.
דער רב זצ"ל איז געווען א זון פון הגה"צ המפורסם רבי משה האגער זצ"ל ראש ישיבת סערט וויזניץ ובעל ברכת משה, א זון פון הרה"ק בעל מקור ברוך מסערט וויזניץ זצ"ל, און א דאפלטער אור אייניקל פון הרה"ק בעל אהבת ישראל מוויזניץ זי"ע. ער האט געצויגן א יחוס צו פילע גדולי עולם אנשי שם, די הייליגע צדיקים לבית וויזניץ, קאסוב, דזיקוב, ראפשיץ, רוזין, און נאך פיל.
דער רב זצ"ל איז געווען אן איידעם ביי כ"ק אדמו"ר מסוליצא זצ"ל, נצר לקדושי עליון צדיקי בית ראפשיץ, נדבורנא, סטראזשניץ, און נאך. אין זיינע יונגע יארן איז ער אויפגעוואקסן אויפן שויס פון זיין גרויסן זיידן הרה"ק בעל מקור ברוך זצ"ל, און שפעטער ביי זיין גרויסן פעטער כ"ק אדמו"ר מסערט וויזניץ זצ"ל בעל חכמת אליעזר צו וועם ער איז געווען אדוק ומקושר.
נאנט צו פערציג יאר נאכאנאנד האט דער רב זצ"ל משמש געווען ברבנות אין ביהמ"ד סערט וויזניץ אין ירושלים, וואו ער האט דערהויבן דעם ציבור מיט זיינע ווארעמע תפילות און געוואלדיגע השפעה. אזוי אויך איז ער געווען דער בעל תפילה ימים הנוראים בחצר הקודש סערט וויזניץ פאר לאנגע יארן.
ליידער האט ער געליטן שווערע יסורים א לענגערע צייט, און די לעצטע וואך צייט איז ער געלעגן על ערש דוי נאכן פלוצלינג אוועקפאלן רח"ל אין א קריטישע צושטאנד. היינט מיטאג איז ער נפטר געווארן לחיי העולם הבא, איבערלאזנדיג א הערליכע דור, בנין וחתנין רבנן, גאר חשובע קינדער און אייניקלעך, רבנים ומורי הוראה, מרביצי תורה און מחברי ספרים.
די לוויה איז פארגעקומען היינט נאכמיטאג בבית מדרשו קהל מקור ברוך סערט וויזניץ אויף רחוב גרוסבערג אין ירושלים, דערנאך ביי ביהמ"ד הגדול אין רמת וויזניץ חיפה, אויפן וועג צום אלטן בית החיים אין צפת וואו ער ווערט געברענגט למנוחה נכונה.
דער רב זכר צדיק לברכה לאזט איבער זיין איינציגן און עלטערן ברודער כ"ק אדמו"ר משאץ וויזניץ שליט"א, די צוויי שוועסטערס הרבנית אשת הגה"צ ר' מאיר כ"ץ שליט"א ראה"כ ש"ס אין רמת וויזניץ חיפה, און אשת הגה"צ ר' אהרן אלי' פעלדמאן שליט"א פון בני ברק.
די חשובע זיהן הגה"צ ר' ברוך האגער שליט"א אב"ד ברכת משה אין רמה ד' בית שמש, איידעם ביי כ"ק אדמו"ר מקרעטשניף שליט"א, הגה"צ ר' מנחם מענדיל האגער שליט"א, איידעם ביי כ"ק אדמו"ר מוויזניץ שליט"א לרפו"ש, הגה"צ ר' יעקב האגער שליט"א, איידעם ביי כ"ק אדמו"ר מפיטסבורג זצ"ל, און הגה"צ ר' מאיר עמנואל האגער שליט"א איידעם ביי הגה"צ אבד"ק ראצפערט בראזיל שליט"א. די דריי טעכטער אשת הגה"צ ר' יודא ארי' האלבערשטאם שליט"א זון פון כ"ק אדמו"ר מגארליץ שליט"א, אשת הגה"צ ר' ישראל צבי לעמבערגער שליט"א זון פון הגה"צ אבד"ק מאקאווא אשדוד שליט"א, און אשת הגה"צ ר' יחיאל יהושע ראבינאוויטש שליט"א זון פון כ"ק אדמו"ר מביאלא ישרי לב שליט"א.
