גאר שווערע נייעס הערט מען היינט מוצאי שבת פונעם ווייטן אוקראינע, אז א העלישע פייער האט פארניכטעט און גאר שטארק געשעדיגט די בנינים ארום דעם ציון הק' פונעם הייליגן בעל התניא זי"ע, אין שטאט האדיטש אין אוקראינע.
ארום דעם ציון הק' איז פארהאן עטליכע גרויסע געביידעס וואס דינט אלס בית המדרש און הכנסת אורחים פאר די טויזענטער אידן וואס זענען כסדר פוקד דעם ציון הק' להיפקד בדבר ישועה ורחמים, רונדע דעם יאר איז דארט פארהאן מנינים צום דאווענען און שיעורי תורה, און דינט אלס צענטערפונקט פאר חסידי חב"ד אין די גאנצע אומגעגנט.
די פייער האט אויסגעבראכן פרייטאג צונאכטס ארום עלף דרייסיג, און האט זיך בליץ שנעל פארשפרייט אינעם הכנסת אורחים קאמפלעקס, שאפנדיג אסטראנאמישע שאדן אין ווערד פון מיליאנען, בחסדי ה' איז נישט געווען קיין מענטשליכע שאדן, און פאר לאנגע שעות האבן די פייערלעשער געארבעט צו איבערקומען די פלאמען.
די פאליציי האט געעפנט א אויספארשונג צו דערגיין די אורזאך פון די פייער, א מעגליכקייט אז עס האט פאסירט צוליב א עלעקטעריק קורצשלוס, אדער צו גאר האט עס פאסירט אין רעזולטאט פון די אנגייענדע מלחמה אין אוקראינע. אזוי צו אזוי האט דער ארטיגער שליח חב"ד הרב שניאור דייטש שליט"א געמאלדן אז מען איז שוין פארנומען מיט העפטיגע פלענער צו איבערבויען די פארברענטע געביידעס צו קענען מרבה זיין פעלים לתורה וחסידות.
