שרעקליכע נייעס הערט מען היינט צופרי פון וויליאמסבורג, אז א ניין יעריג קינד וואס איז געווען אויפן וועג אין חדר אריין, איז ליידער טראגיש אומגעקומען רח"ל נאכן ווערן אראפגעקלאפט דורך א באס, ביים ווינקל פון ליע עוועניו און לארימער סטריט.
דאס קינד הילד יואל יאקאבאוויטש ע"ה ניין יאר אלט, א וואוילער אינגל אין די סאטמארער חדר אין וויליאמסבורג, א זון פון הרב החסיד ר' נפתלי הירצקא יאקאבאוויטש הי"ו, איז געווארן אראפגעקלאפט דורך א באס פון וואס ער איז ליידער שווער געשעדיגט געווארן און נפטר געווארן אויפן פלאץ ה"י.
עמערדזשענסי אגענטורן זענען אנגעקומען אויפן סצענע אבער די גזירה איז שוין געווען פארשריבן, און חסד של אמת און מתעסקים זענען געווארן אראפגערופן צו די סצענע צו באגלייטן די סיטואציע. די לוויה וועט בעז"ה פארקומען היינט צוויי אזייגער נאכמיטאג ביי יראים טשאפל אין וויליאמסבורג.
אידישע קינדער זענען מתפלל אז מען זאל שוין נישט הערן אזעלכע שוידערליכע געשיכטעס, ונשמע ונתבשר בשורות טובות.
