מיט עטליכע חדשים צוריק האבן מיר דא באריכטעט איבער א מאסיווע בוי פראיעקט וואס איז אונטערגענומען געווארן דורך הנהלת מוסדות בוהוש, ארויפצובויען נאך עטליכע שטאק אויפן בנין פון די בוהושער ישיבה און בית המדרש, צוצוברענגען הרחבת הדעת פאר די תלמידי הישיבה וואס געפונען זיך אצינד שרעקליך צושטופט אין די עקזיסטירנדע געביידע.
אין די לעצטערע וואכן איז די בוי ארבעט אריין אין א גאר שנעלן פאזע, ווען מען רוקט זיך פאראויס מיט גרויס סייעתא דשמיא, די דרויסענדיגע געבוי איז שוין היבש אהערגעשטעלט, און מען ארבעט אויף פארשידענע פראנטן צו קענען פארענדיגן פולשטענדיג די געביידע ווי אמשנעלסטן.
אין די פארגאנגענע טעג איז כ"ק אדמו"ר מבוהוש שליט"א אריבערגעקומען אין באגלייטונג פון די געטרייע עסקנים און חברי הנהלת המוסדות, צו זעהן מיט די אייגענע אויגן די געוואלדיגע פארשריט בעבודת הבניה, און גאר ווארעם אנגעוואונטשן די עוסקים במלאכת הקודש.
אויך איז אין די יעצטיגע טעג באשטעטיגט געווארן די זמן ווען עס וועט געפייערט ווערן די מעמד הנחת אבן הפינה און מעמד היסוד, עס וועט פארקומען אויף א אייגענארטיגע פארנעם בביתו נאוה קודש פון כ"ק אדמו"ר מבוהוש שליט"א, ספעציעל געאייגענט פאר א ענגע צאל נגידים ותומכים בוני הבית.
