מטעם הנהלת מוסדות בוהוש בארץ הקודש ווערט געמאלדן איבער א ערשטמאליגע נסיעה וואס כ"ק אדמו"ר מבוהוש שליט"א נעמט אונטער אויפצוטרייבן שטיצע לטובת די מוסדות, ווען דער רבי וועט ארויספארן צום נאסטאלגישן שטאט קערעסטיר אין אונגארן, אינאיינעם מיט א געקליבענע צאל נדיבי לב תומכי המוסדות, וואס וועלן זיך אנשליסן מיט באדייטענדע סכומים ארויסצוהעלפן שליכטן די שווערע חובות אין וואס די מוסדות געפונט זיך.
ווי באקאנט פירט זיך די בוהושער מוסדות על טהרת הקודש, אן קיין שום הכנסות פון די ארטיגע רעגירונג, בהוראת הקודש פון כ"ק אדמו"ר מבוהוש שליט"א, און צו אויסהאלטן א מוסדות אויף אזא פארנעם קאסט שווערע געלטער אויף יעדע טריט און שריט.
טראץ וואס דער רבי שליט"א איז שוין געווען דעם ווינטער אויף א נסיעה צו די מקומות הקדושים אין פוילין לטובת די מוסדות, נעמט דער רבי אונטער אצינד א פרישע נסיעה, און צום ערשטן מאל וועט דער רבי פוקד זיין דעם ציון הק' פונעם הייליגן צדיק רבי ישעי'לע קערעסטירער זי"ע אינאיינעם מיט די נדיבי לב, אויסצופועל'ן ישועות ורפואות און פרנסה בריוח ביים שר הפרנסה.
לויט די פלענער וועט די מסע הקודש פארקומען ענדע חודש סיון, מיטן האפענונג אז די מצב המלחמה אין ארץ ישראל זאל נישט צוברענגען קיין שום עגמת נפש און לעצט מינוטיגע טוישונגען.
