מיט שאק און שוידער ווערט אויפגענומען די שרעקליכע בשורה היוצא משערי ירושלים, איבער די פלוצלינגדיגע הסתלקות לשמי מרום פון כ"ק אדמו"ר מלעלוב, הרה"ק רבי ישכר דוב בידערמאן זצ"ל, וועלכער האט פארשיינט כלל ישראל מיט זיין צדקות ופרישות און משפיע געווען תורה וחסידות אויף טויזענטער אידן.
דער רבי זכר צדיק לברכה, וועם מען פלעגט אויך רופן מיטן נאמען "לעלוב פיעטריקוב" איז געווען א זון פון הרה"ק רבי משה מרדכי מלעלוב זי"ע בעל ברכת משה, און האט געצויגן א הערליכע יחוס צו די הייליגע לעלובער דינאסטיע און נאך פילע צדיקים וקדושים. ער האט אנגעפירט זיין שיינעם הויף אין ירושלים, וואו עס האבן זיך געקלאמערט טויזענטער אידן אין יעדע געלעגנהייט און נהנה געווען פון אים עצה ותושיה.
דער רבי זצ"ל איז געווען באקאנט מיט זיין ווארעמע שמייכל און הארת פנים צו יעדן איד, טויזענטער אידן האבן געשפירט ביים רבי'ן א אפענע אויער און געהאלטן פאר א זכיה זיך צו קלאמערן לאורו הגדול, דער רבי איז געווען באקאנט מיט זיין פשטות און ענוות חן, קיינמאל געמאכט קיין וועזן און זיך אויפגעפירט מיט א זעלטענעם התבטלות, וכולם אומרים קדוש אז עס האנדלט זיך פון א העכערע איד מגזע אראלים ותרשישים.
היינט אינדערפרי איז דער רבי זצ"ל ליידער פלוצלינג צוזאמגעפאלן זייענדיג אין מקוה זיך צו מקדש ומטהר זיין, טראץ די לענגערע פרואוון פון די הצלה וואלאונטירן צו ראטעווען דעם רבי'ן איז אבער די גזירה געווען פארשריבן, און דער רבי איז קורצליך דערויף ליידער נסתלק געווארן לגנזי מרומים.
די מיטה איז אריינגעברענגט געווארן בהיכל בית מדרשו של רבי קהל קדושת מרדכי לעלוב אויף רחוב בר אילן, פון וואו די לוויה וועט ארויסגיין היינט 10 אזייגער ביינאכט ברחובות ירושלים, אויפן וועג צום הר הזיתים וואו דער רבי וועט געברענגט ווערן למנוחת עולמים.
זכר צדיק לברכה לחיי העולם הבא.
