חסידי בעלזא אין די בליענדע ישוב הר יונה אין נוף הגליל האבן היינט מיט באדויער אויפגענומען די נייעס, אז די גרויסע שבת וואס האט געזאלט געפראוועט ווערן דעם שבת קודש פרשת תזריע טהרה שבת ראש חודש אייר, אין שפיץ פון הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א, איז אין די לעצטע מינוט געווארן אפגערופן צוליב די מצב הבריאות ביי כ"ק אדמו"ר מבעלזא שליט"א.
הגה"צ ר' אהרן מרדכי שליט"א האט געזאלט פראווענען דעם שבת אויף א גרויסע פארנעם אין הר יונה, צום ערשטן מאל זינט די גרינדונג פון די בעלזא קהילה דארט אין שטאט, לרגל די הרחבת גבולי הקדושה אין די קהילה און מוסדות, און די מעמד הנחת אבן הפינה פארן נייעם בנין בית המדרש דחסידי בעלזא אין שטאט.
היינט פרייטאג האט הגה"צ ר' אהרן מרדכי שליט"א מודיע געווען פאר די חסידים אין א טעלעפאנישן רוף, אז מה' היתה זאת אז ער האט נישט די מעגליכקייט צו קומען אויף שבת, וויבאלד ער דארף פארבלייבן אין ירושלים לימין הקודש פון אביו הגדול כ"ק אדמו"ר מבעלזא שליט"א. דערביי האט ער פארשפראכן צו משלים זיין די באזוך אין א אנדערע געלעגנהייט מיטן אויבערשטנס הילף.
דאס קומט נאכדעם וואס אין די לעצטערע טעג געפונט זיך כ"ק אדמו"ר מבעלזא שליט"א אין א שוואכן געזונט צושטאנד, און א ספעציעלע מודעה איז געווארן ארויסגעשטעלט אז מען זאל מתפלל זיין לחיזוק כוחותיו פונעם רבי'ן, כ"ק מרן ישכר דוב בן מרים לרפואה שלימה. מניני תהלים זענען פארגעקומען נעכטן ערב ראש חודש אייר אין פילע מקומות הקדושים, און אין די מוסדות הקדושים דחסידי בעלזא.
היינט פרייטאג ערב שבת קודש איז פארגעקומען די שמחת הברית פון א אור אייניקל ביים רבי'ן שליט"א, בן הנולד ביי הרב אברהם סאפרין שליט"א. מיטן אויבערשטנס הילף האט זיך דער רבי באטייליגט פערזענליך ביים שמחת הברית אין ביהמ"ד הגדול, אבער צו די שמחת הקריאת שמע ליינען און וואכנאכט נעכטן אויפדערנאכט, און אזוי אויך צום סעודת הברית, איז דער רבי נישט ערשינען במלוא הדרו מפאת חולשת גופו.
