שטייענדיג ביים ערשטן יום טוב זינט כ"ק אדמו"ר מקרעטשניף סיגעט וומס"ב שליט"א איז נתעלה געווארן בכתר האדמורו"ת, איז באנייעט געווארן א פרישע אכסניא פארן ביהמ"ד קהל נחלי אמונה קרעטשניף סיגעט, אין א מקום רחבת ידים אויף ספענסער סטריט נעבן פלאשינג עוועניו, צוצוברענגען הרחבת הדעת פאר די מתפללים און חסידים.
ביהמ"ד קרעטשניף סיגעט אין וויליאמסבורג, איז ביז היינט געווען איינקוואטירט אין א קליינע לאקאל אויף הופפער סטריט, אין דעם מקום קדוש האט כ"ק אדמו"ר מקרעטשניף סיגעט זצ"ל געפראוועט די עבודת הקודש פאר א לעכטיגע תקופה, וואוינענדיג אין וויליאמסבורג די ערשטע צען יאר אלס רבי, ביז ער האט זיך געצויגן קיין ירושלים עיה"ק פאר די לעצטע צען יאר.
נאכן הסתלקות פונעם רבי'ן זצ"ל מיט עטליכע וואכן צוריק, איז אויפגענומען געווארן דער צווייטער זון כ"ק אדמו"ר הרה"צ רבי יחזקאל שרגא שליט"א לכהן פאר אלס אדמו"ר מקרעטשניף סיגעט אין וויליאמסבורג, זייענדיג דער רב אין ביהמ"ד די לעצטערע יארן, אבער די ביהמ"ד איז געווען צו קליין צו קענען אקאמאדירן דעם ציבור ביי די תפילות און טישן, ווען דעם ערשטן שבת איז געפראוועט געווארן אין די גרויסע עדן פאלאס זאל אין וויליאמסבורג.
אצינד צו די ימים הנוראים איז באנייעט געווארן א פרישע אכסניא אויף ספענסער, וואו מען האט געפראוועט דעם יו"ט ראש השנה, און אזוי אויך אלע שבתים און ימים טובים אין די קומענדיגע תקופה, ווען די וואכעדיגע תפילות וועט ווייטער פארקומען אינעם אלטן בית המדרש אויף הופפער סטריט.
