די חסידישע אידענטום אין שטאט לאנדאן איז איינגעהילט אין התרגשות דקדושה, מיטן ערהאלטן די בשורה משמחת איבער א חשובער גאסט וואס וועט מופיע זיין בשערי העיר, כ"ק אדמו"ר מסקולען שליט"א פון וויליאמסבורג, וועלכער וועט אונטערנעמען א געהויבענע מסע הקודש קיין לאנדאן מחזק צו זיין די ארטיגע אידנטום, און משפיע זיין מהודו והדרו אויף די תושבי העיר.
דער רבי שליט"א נעמט אונטער דעם מסע הקודש נאך וואס פילע חסידים ומעריצים לבית סקולען אין לאנדאן האבן מערערע מאל פארבעטן דעם רבי'ן צו קומען פראווענען א שבת אין שטאט, אצינד האט דער רבי אנגענומען דעם איינלאדענונג און וועט אהינפארן פראווענען דעם קומענדיגן שבת חנוכה.
ספעציעל שטייגט די התרגשות ביי די חסידים, ווען צום ערשטן מאל וועט דער רבי שליט"א פראווענען די הייליגע מעמדים פון הדלקת נרות חנוכה ברוב עם אויפן ענגלישן באדן, נאך וואס זיין פאטער כ"ק אדמו"ר הרה"ק בעל מאור ישראל מסקולען זי"ע האט שוין אין די פארגאנגענהייט עטליכע מאל געצינדן די חנוכה ליכט אין שטאט לאנדאן.
דער רבי שליט"א וועט זיך ארויסלאזן אין וועג דאנערשטאג נאכט פרשת מקץ נאכן צינדן די פיפטע לעכטל בביתו נאוה קודש אין וויליאמסבורג, דער רבי וועט מופיע זיין בשערי העיר לאנדאן ערב שבת חנוכה, און פראווענען א געהויבענע און ערשטמאליגע שבת אין די גרויסע יסודי התורה זאל אין צענטער פון שטאט, א שבת וואס איז ערווארטעט צונויפצוברענגען א ריזן עולם חסידים ואנשי מעשה.
מוצאי שבת קודש וועט דער רבי שליט"א צינדן די נרות ברוב עם הדרת מלך, און אזוי אויך צומארגנס זונטאג נאכט ליל זאת חנוכה, ווען פילע תושבי העיר וועלן אויסנוצן די געלעגנהייט און זיך דערווארעמען ביי די לעכטיגע סקולענער ליכטעלעך בשלהבת אש קודש.
