פארגאנגענע וואך דאנערשטאג פרשת יתרו, איז פארגעקומען א הייליגער מעמד קביעת מזוזה און חנוכת הבית, פאר די נייע פראכטפולע לאקאציע פון "אודה", וואס איז באקאנט ביי כלל ישראל איבער די וועלט מיט זייער שטענדיגע און איבערגעגעבענע הילף פאר חולי ישראל וואס דארפן צוקומען צו מעדיצינישע הילף אין פארשידענע הינזיכטן, איבערהויפט ווען מען דארף דורכגיין קאמפליצירטע טראנספלענטס אויף קריטישע ארגאנען.
נאך לאנגע יארן וואס די עבודת הקודש איז געטון געווארן אין א צייטווייליגע לאקאל, האט מען אצינד זוכה געווען צו באנייען א שפאגל נייע לאקאציע אין הארץ פון וויליאמסבורג, וואס טוט צוברענגען גרויס הרחבת הדעת פאר די חשובע עסקנים און אלע איינגעשטעלטע וואס באגלייטן די חולי ישראל מיט א זעלטענע געטריישאפט.
די מעמד איז באשיינט געווארן דורך הגה"צ ר' בנימין זאב לאנדא שליט"א דומ"ץ טאהש, וועלכער שטייט אין שפיץ פון די ארגענעזאציע צו באגלייטן אלע אקטיוויטעטן אויפן תורה'דיגן מהלך, צו ענטפערן קריטיש וויכטיגע שאלות אין פיקוח נפש און אזוי ווייטער. דער דיין האט קובע געווען די מזוזה, און דערנאך געפראוועט א מסיבת לחיים אינאיינעם מיט די חשובע עסקנים.
א לענגערע צייט האט דער דיין ארומגעשמועסט מיט די אנוועזנדע איבער די געוואלדיגע אויפטואונגען פון "אודה", און עס איז אויפגעברענגט געווארן פארשידענע שאלות בהלכה וואס זענען נוגע אויף טריט און שריט, קאמפליצירטע שאלות וואס מאכט זיך ביים דורכפירן טראנספלענטס אויף געוויסע אברים, איבער די חיוב פון יעדע איד ארויסצוהעלפן אנדערע בעת צר און אזוי ווייטער.
אין בעפארברייטונג צום מעמד קביעת מזוזה, איז כ"ק גאב"ד סאטמאר מאנסי שליט"א אנגעקומען אויף א באזוך אין די נייע אפיסעס און אפגעראכטן א מסיבת לחיים מיט די עסקנים, זייענדיג באקאנט פונדערנאנט מיט די געוואלדיגע פעולות פון "אודה".
