אין די יעצטיגע ערב יום טוב טעג איז פראקלאמירט געווארן די גענויע פלענער איבער א נייע גיגאנטישע בנין של שמחה וחסד שע"י ק"ק באבוב, די בנין וועט געבויעט ווערן אויפן שטח וואו עס איז לעצטנס געווארן איינגעווארפן די אלטע באבובער ת"ת געביידע, מלפנים ת"ת נאוואמינסק, ווי באריכטעט מיט עטליכע חדשים צוריק.
די נייע בנין מפואר וועט אנהאלטן אכט שטאק, און פארמאגן מערערע שמחה זאלן צו קענען פראווען שמחות בטוב לבב מיטן "חיים של שלום" פלאן וואס שפארט צענדליגער טויזענטער דאלארן פון מחותנים בעת שמחתם. אצינד איז בלויז דא די הערליכע זאלן בבנין בנות ציון, און עס וועט געבויעט ווערן נאך עטליכע זאלן כדי נאכצוקומען די פארלאנג און אויסברייטערן די מעגליכקייטן.
אויך וועט דאס בנין פארמאגן צענדליגער שטיבער פאר הכנסת אורחים, פאר די הונדערטער געסט וואס קומען צו פארן לחסות בצל הקודש פון כ"ק אדמו"ר מבאבוב שליט"א, בעידן חדוותא בחצר הקודש, צו אויף ימים טובים און יומי דפגרא.
אזוי אויך וועט די דאזיגע בנין ערפילן נאך א וויכטיגע געברויך, מיטן אהערשטעלן פילצאליגע אפיסעס און שטיבער פאר די ארגוני ופעולות החסד אין די באבובער קהילה, וואס דורך דעם וועט מען קענען מרחיב און מרבה זיין די צדקה וחסד לטובת הכלל ובפרט.
לויט ווי עס ווערט איבערגעגעבן האלט מען שוין אין די לעצטע שטאפלן פון זיך נעמען צום מלאכת הבניה, אויפן שטח וואס שטייט קעגן איבער די פולע לאטס וואס דאס קהלה האט לעצטענס געקויפט פארן אויפבוי פון בנין ביהמ"ד הגדול והחדש ד'באבוב.
