אין די יעצטיגע טעג איז געשלאסן געווארן א מוצלח'דיגע מקח פאר א נייע הערליכע בנין הכנסת אורחים אין שטאט קאסאן אין אייראפע, סמוך ונראה צום ציון הק' פון די הייליגע צדיקים לבית קאסאן זכותם יגן עלינו, וואס וועט זיין א גרויסע הילף פאר די פילע אידן וואס זענען פוקד דעם ציון הק' דורכאויס די גאנצע יאר, און בפרט אין די טעג ארום די יארצייטן.
די שטאט קאסאן געפונט זיך אין אוקראינע, נישט ווייט פון די גרעניץ מיט אונגארן, עס ליגן דארט באערדיגט די הייליגע צדיקים פון די קאסאנער דינאסטיע, הרה"ק רבי יהוסף זי"ע בעל בני שלשים, און זיין עלטסטן זון הרה"ק רבי חיים שלמה זי"ע בעל שמועה טובה.
ביז היינט האבן די מתפללים ביים ציון הק' נישט געהאט וואו זיך אפצושטעלן אין שטאט, און אויסער מתפלל זיין ביים ציון הק' האט מען נישט געקענט טון קיין שום באדערפענישן דארט אין די אומגעגנט, א פאקט וואס האט ווי פארשטענדליך גאר שטארק פארשווערט פאר די מתפללים ביים ציון הק', און אויך רעדוצירט די צאל מתפללים וואס עס וואלט געקענט זיין מיט א פולשטענדיגע הכנסת אורחים.
אצינד נאך לענגערע הארעוואניע און השתדלות דורך חשובע אייניקלעך, בברכתם ובעידודם פון כ"ק האדמורי"ם שליט"א לבית קאסאן, איז אין א מזל'דיגע שעה דורכגעפירט געווארן די געלונגענע מקח אפצוקויפן א עקזיסטירנדע געביידע וואס פלעגט אמאל זיין א קרעטשמע פאר דורכגייער, און איז שטארק געאייגענט פאר א בנין הכנסת אורחים וואס זאל צוברענגען אלע נויטיגע באדערפענישן פאר די מתפללים ביים ציון הק'.
לכבוד די גרויסע דערגרייכונג איז א דעלעגאציע פון עטליכע קאסאנער אייניקלעך ארויסגעפארן קיין אוקראינע צו דורכפירן דעם מקח, אין שפיץ פון כ"ק אדמו"ר מקאסאן לאנדאן שליט"א וועלכער איז געקומען צו פארן אינאיינעם מיט א פמליא נכבדה פון לאנדאן, און בשעה טובה ומוצלחת האט מען אונטערגעשריבן קאנטראקט אפצוקויפן דעם בנין, וואס איז אויפן פלאץ שוין פארוואנדלט געווארן אלס א ריכטיגער הכנסת אורחים צענטער מיט אלע באדערפענישן פאר די מתפללים ביים ציון הק'.
נעכטן דינסטאג ביום כ"ד סיון איז דורכגעפירט געווארן די מקח אין א מזל'דיגע שעה, און דערנאך איז פארגעקומען א מסיבת לחיים אין די נייע הכנסת אורחים געביידע, אין שפיץ פון כ"ק אדמו"ר מקאסאן לאנדאן שליט"א און די אנוועזנדע משתתפים. דערביי איז געצייגט געווארן די באקוועמע איינריכטונגען וואס איז שוין צוגעשטעלט אינעם בנין, א גרויסע צימער וואס ווערט פארוואנדלט אין א בית המדרש, א גרויסע צימער וואס וועט דינען אלס חדר אוכל, א גרויסע קאך וואס ווערט גע'כשר'ט בהידור רב, עטליכע שלאף צימערן צו קענען זיך אפרוען און איבערנעכטיגן, און א שיינע חצר וואו צו קענען שפאצירן אינדרויסן.
