ביטערע נייעס הערט מען אצינד פון ארץ ישראל, אז עס איז נפטר געווארן הרבנית רחל ראזענבוים ע"ה, אשת חבר כ"ק אדמו"ר ממעזבוזש שליט"א, און אייניקל פון כ"ק אדמו"ר מקאמארנא שליט"א, אין עלטער פון 38 יאר נאך א לאנג פארצויגענע קראנקהייט רח"ל, איבערלאזנדיג א שטוב מיט זעקס קליינע קינדערלעך אינדערהיים ה"י.
די רעבעצין ע"ה איז געווען א טאכטער פון הגה"צ המקובל רבי מתתיהו סאפרין זצ"ל, א זון פון להבחל"ח כ"ק אדמו"ר מקאמארנא שליט"א, און איידעם ביי הגה"צ רבי משה אדלער זצ"ל אבד"ק טארדא. אויפן שויס פון אירע חשובע עלטערן און זיידעס איז זי נתחנך געווארן בדרך ישראל סבא, און אויפגעשטעלט איר שיינעם שטוב על אדני התורה והחסידות מחנך צו זיין דורות ישרים ומבורכים.
בהגיעה לפירקה האט זי חתונה געהאט מיט איר חשובער מאן כ"ק אדמו"ר ממעזבוזש הרה"צ רבי דוד צבי ראזענבוים שליט"א, וועלכער איז באקאנט מיט זיין שטארקע עבודה מקרב צו זיין אידישע קינדער לאביהם שבשמים, א זון פון כ"ק אדמו"ר מראחוב שליט"א, און א אייניקל פון די הייליגע צדיקים לבית נדבורנא, זידטשויב, ולמעלה בקודש.
ליידער האט זי זיך געמוטשעט די לעצטערע יארן מיט די ביטערע מחלה ה"י, ווען אידישע קינדער האבן מתפלל געווען לרפואתה, און יעצט ביינאכט אין ארץ ישראל איז זי נפטר געווארן לחיי העולם הבא, אין בליענדן עלטער פון אכט און דרייסיג יאר, איבערלאזנדיג איר חשובער מאן דער מעזבוזשער רבי שליט"א מיט א משפחה פון זעקס קינדערלעך, איר מאמע הרבנית תליט"א, איר זיידע כ"ק אדמו"ר מקאמארנא שליט"א, און פילע בני המשפחה ידידים און חסידים וואס זענען ערשיטערט און צובראכן.
