די חברה הצלה ארגענעזאציע אין בארא פארק איז היינט ארויסגעקומען מיט א הייסע ווענדונג צו אלע קהילות הקודש אין בארא פארק, אפעלירנדיג צו די עסקני הקהילות צו טון וואס מעגליך נישט אפצושפארן קיין גאסן פאר די הדלקות ל"ג בעומר, נאך וואס עס קומט ליידער צו צו א מצב פון סכנת נפשות, ווען הצלה קען נישט דערגרייכן וויכטיגע רופן צוליב די אפגעשפארטע גאסן.
אין די לעצטע פאר יאר איז שטארק געשטיגן די צאל הדלקות וואס ווערן אפגעראכטן ל"ג בעומר אין בארא פארק, איבערהויפט אין די נאכט שעה'ן בליל ל"ג בעומר ווען אסאך גאסן ווערן פארשלאסן פאר די הדלקות, און עס ברענגט אומגעהויערע טראפיק פראבלעמען איבער די גאנצע שטאט, וואס האט א שטארקע אפעקט אויף די הצלת נפשות מיסיע פון הצלה וואלאונטירן.
דעריבער איז הצלה ארויסגעקומען מיט א רוף צו אלע עסקני הקהילות, אז מען זאל גוט איבערטראכטן אויב עס איז טאקע אזוי וויכטיג אפצושפארן די גאס, בעפאר מען מאכט די באשלוס אפצושליסן די גאס, און מען זאל נעמען אין אכט די שווערע אפעקט וואס דאס קען האבן אויף אחינו בני ישראל בכלל, און אויף פיקוח נפש בפרט.
