פון עיר הקודש ירושלים קומט אן אצינד די שווערע בשורה איבער די פטירה פון הגאון הצדיק חסידא ופרישא רבי מאיר בראנד זצ"ל, חבר ביד"ץ קהל מחזיקי הדת בעלזא, ומרבני חצר הקודש ביאלא.
הגאון ר' מאיר צבי איז געווען פון די גאר חשובע מרביצי תורה בדורינו, ער איז געווען פון די ראשי הכולל אין שומרי החומות, און א חבר נשיאות און קביעות'דיגער בוחן אין ראם פון "מפעל הש"ס העולמי", מיסודו פון הגה"ק מצאנז קלויזענבורג זי"ע בעל שפע חיים.
געבוירן איז ער ערב ראש חודש שבט תש"ד צו זיין פאטער הרב הגאון ר' אליעזר דוד בראנד זצ"ל ר"ם בישיבת שומרי החומות, אלס בחור האט ער געלערנט אין די בארימטע סלאבאדקע ישיבה אין בני ברק, און דערנאך געווארן אן איידעם ביי הגאון החסיד ר' נתן מאיר רויטמאן זצ"ל. אלס אינגערמאן איז ער געווען א מלמד תשב"ר, און אין יאר תש"ל איז ער געווארן אויפגענומען אלס בעל תוקע בחצר הקודש ביאלא, דורך הרה"ק בעל חלקת יהושע מביאלא זי"ע.
בחצר הקודש ביאלא איז ער געווען פון די זקני ופארי העדה, פארלאפענע יאר ביי די מסע הלוויה פון כ"ק אדמו"ר מביאלא זצ"ל האט ער מספיד געווען אין נאמען פון אלע חסידים, און א וואך דערויף ביים מעמד הכתרה פון להבחל"ח כ"ק אדמו"ר מביאלא שליט"א, איז ר' מאיר צוגעגאנגען צום רבי'ן און דערלאנגט די ערשטע קוויטל להיזכר לטובה.
יעצט נאכמיטאג אין ארץ ישראל איז הגאון ר' מאיר נפטר געווארן לחיי העולם הבא אין עלטער פון איין און אכציג יאר, נאכן ליידן פארלאפענעם שבת פון א שווערע הארץ אטאקע רח"ל, איבערלאזנדיג א הערליכע דור ישרים יבורך.
די לוויה וועט פארקומען היינט אויפדערנאכט צען אזייגער ביים בית הלוויות שמגר אין ירושלים, דערנאך ביי ביהמ"ד הגדול ביאלא אויף רחוב יעקובזון, אויפן וועג צום הר הזיתים וואו ער וועט קומען לקבורה.
