חסידי קארלין סטאלין אין ביתר עילית האבן מיט גרויס פרייד מחנך געווען א נייעם בנין בית המדרש לתורה ולתפילה, א גרויסע פראכטפולע געביידע פארן ביהמ"ד "בית יעקב חיים" דחסידי קארלין סטאלין אין שטאט, וואס איז אין די טעג פארענדיגט געווארן כלול בהדרו נאך א לענגערע בוי פראיעקט.
די בוי ארבעט איז געווארן אונטערגענומען מיט די נאכאנאנדע בליה און וואוקס פונעם ציבור חסידים אין שטאט ביתר, ווען פון איבער גאנץ ארץ ישראל איז אין ביתר פארהאן די גרעסטע צאל קארלין סטאלינער חסידים, מיט מערערע בתי מדרשים און מוסדות התורה, ישיבות הקדושות און אלעס וואס פעלט זיך אויס פאר א ריכטיגע חסידישע אימפעריע בתוככי העיר.
די נייע בית המדרש געפונט זיך אין די גבעה בי געגנט, אויף רחוב קדושת לוי, און איז באנייעט געווארן פארגאנגענעם שבת קודש פרשת כי תצא, מיט פרייליכע ריקודין בפניא דמעלי שבתא דורך די פילע חסידים ומתפללי בית המדרש. אצינד גרייט מען זיך צום מעמד קביעת מזוזה וואס וועט פארקומען מארגן דאנערשטאג פרשת כי תבוא י"ד אלול, אין שפיץ פון כ"ק אדמו"ר מקארלין סטאלין שליט"א וועלכער וועט אנקומען אויף א געהויבענע באזוך אין שטאט און מחנך זיין דעם נייעם בית המדרש מיט א תפילה און לחיים טיש ברוב עם, נאכגעפאלגט מיט פרייליכע ריקודין צום גרויסן דערגרייכונג.
