א געוואלדיגע דורכברוך איז פארגעקומען דעם דאנערשטאג אינעם עיר ואם בישראל בארא פארק, ווען די פארוואלטונג פון די באקאנטע "עפל באנק" וואס דרייט אדורך ביליאנען דאללארן אין די אמעריקאנער עקאנאמיע, האט אונטערגעשריבן א היתר עיסקא צו זיין ערליך אויסגעהאלטן מיט אלע הידורים, אונטער די פערזענליכע באגלייטונג פון הגה"צ ר' יחיאל מיכל שטיינמעטץ שליט"א דומ"ץ סקווירא ב"פ.
די דורכברוך איז צושטאנד געקומען נאך לענגערע ארבעט פון די בארימטע KFI ארגענעזאציע, א תורה'דיגע מכון וואס גיבט זיך אפ אריינצוברענגען עקאנאמישע ריזן אין א וועלט פון שמירת תורה ומצוות, גרויסע בענק און פינאנציעלע פירמעס וואס האבן א אידישע בעלות זאלן זיין פולקאם אויסגעהאלטן לויט די הלכה, אויסגעארבעט לויט א היתר עיסקא מיט א הכשר פון רבנים.
אצינד איז געקומען די שטארקע דורכברוך ווען די פארוואלטונג פון עפל באנק האט אונטערגעשריבן א היתר עיסקא, ביי א ספעציעלע צערעמאניע וואס איז אפגעהאלטן געווארן דעם דאנערשטאג אין שטוב פון הגה"צ דומ"ץ סקווירא ב"פ שליט"א, עס זענען פערזענליך אראפגעקומען די הויכראנגיגע באאמטע פון עפל באנק, דער סי אי או און אנדערע הויכע פירער אין די באנק פארוואלטונג.
מען האט געהערט א דרשה פון הרב אהרן יוסף גארדאן שליט"א איבער די אחריות וואס ליגט דא אויפן טיש, און די געוואלדיגע תורה'דיגע דערגרייכונג וואס מען באקומט אצינד. אויך האט אויפגעטרעטן הרב אברהם משה לבנוני שליט"א, און הרב אהרן ווידער שליט"א, און דער סקווירא דיין האט אויסגעשמועסט אלע הלכה'דיגע אנגעלעגנהייטן, ווען די באנק פארוואלטונג האט געצייגט גרויס אינטערעסע און קלארגעשטעלט אז זיי ווילן זיין אויסגעהאלטן על פי הלכה, צו קענען טון ערליכע ביזנעס מיט אידישע קליענטן.
נאכן אונטערשרייבן די נויטיגע דאקומענטן, האט דער סקווירא דיין געשאנקען פאר די הויפט פארוואלטער פון די באנק א ספעציעלע תעודת כשרות, ארויסברענגענדיג די פרייד פון ביידע זייטן, סיי די באנק פארוואלטונג וואס וועט גרינגער קענען טון ביזנעס מיט היימישע אידן, און סיי די אידישע קליענטן אין פילע שטעט וואס באנוצן זיך מיט עפל באנק, וואס פארמאגט הונדערטער ברענטשעס אין מערערע אידישע געגנטער.
